HEU-nyń sońǵy jahandyq málimeti boıynsha álemde 115 mıllıon bala qaýipti jumysqa tartylǵan - V.Ermolovıch
ALMATY. 10 maýsym. QazAqparat /Ádilet Musahaev/ - Halyqaralyq eńbek uıymynyń (HEU) sońǵy jahandyq málimeti boıynsha, álemde 115 mıllıon bala qaýipti jumysqa tartylǵan. Bul jumystar balalardyń densaýlyǵyna zııanyn tıgizip, olarǵa moraldyq turǵyda qaýip tuǵyzýy múmkin.
Bul jaıynda búgin Almaty qalasy Balalar quqyqtaryn qorǵaý departamenti dırektorynyń orynbasary Vladlena Ermolovıch Dúnıejúzilik balalar eńbegine qarsy kúres kúnine oraılastyrylǵan baspasóz máslıhatynda málim etti.
Onyń aıtýynsha, jyl saıyn maýsym aıynyń 1-12 aralyǵynda Qazaqstanda «12 kúndik balalar eńbegin paıdalanýǵa qarsy kúres» Ulttyq aqparattyq naýqany ótkiziledi. «Bıylǵy halyqaralyq naýqan «Nazar aýdaryńyzdar! Balalar qaýipti jumystarda! Balalar eńbeginiń nashar túrlerin joıaıyq» taqyrybynda ótýde. Bul sharany ótkizýdegi basty maqsat - balalar eńbeginiń máseleleri jáne onyń sheshý joldary jaıly aqparatty turǵyndarǵa keńinen jetkizý bolyp tabylady»,-deıdi ol.
Almaty qalasynda qaýipti jáne zııandy jumys túrlerinde jumys jasaıtyn balalarǵa arnalǵan 2011 jyldyń 12 kúndik naýqandy ótkizý Almaty qalasy ákiminiń orynbasary, balalar eńbeginiń eń nashar túrlerin joıý jónindegi úılestirý keńesiniń tóraǵasymen bekitilgen.
Mamandardyń paıymdaýynsha, balalar eńbeginiń eń nashar túrlerin, jastardy kásibı mamandyqtarǵa oqytýmen almastyryp, balalardy eńbekpen qamtý jáne jazǵy demalysyn uıymdastyrý qajet. Osy tusta Almaty qalasy Balalardyń quqyqtaryn qorǵaý departamenti seriktesteriniń biri bolyp tabylatyn halyqaralyq áleýmettik jobalar qaýymdastyǵymen 9-shy synyp bitirýshilerge arnap jasóspirimderdiń qabiletin anyqtaý men baǵalaýǵa baǵyttalǵan semınarlar uıymdastyrmaq.
Jalpy Almaty qalasynyń Balalardyń quqyqtaryn qorǵaý departamentinde balar eńbeginiń eń nashar túrleriniń aldyn alý jáne joıý jóninde «jedel jeli» jumys isteıdi.
Atalǵan jıynǵa memlekettik organdardyń ókilderi, Іshki ister departamenti, Almaty qalasy boıynsha Baqylaý jáne halyqty áleýmettik qorǵaý departamenti, MEU jáne taǵy basqa uıym ókilderi qatysty.
