Henley & Partners: Eń yqpaldy tólqujattar tiziminde Qazaqstan neshinshi orynda
ASTANA. KAZINFORM – Brıtanııalyq Henley & Partners konsaltıngtik kompanııasy 2026 jylǵa arnalǵan álemdegi eń yqpaldy tólqujattar reıtıngin jarııalady.
Kompanııanyń málimeti boıynsha, 2026 jyly eń tıimdi tólqujattar Sıngapýr, Japonııa jáne Ońtústik Koreıa azamattaryna tıesili. Mysaly, Sıngapýr azamattary 227 el men aýmaqtyń 192-sine vızasyz kire alady. Japonııa men Ońtústik Koreıa azamattary 188 elge vızasyz barý múmkindigine ıe.
Úshinshi orynǵa bes eýropalyq el – Danııa, Lıýksembýrg, Ispanııa, Shvetsııa jáne Shveıtsarııa birdeı deńgeıde ıe boldy. Bul elderdiń azamattary 186 memleket pen aýmaqqa vızasyz bara alady.
Qazaqstannyń tólqujaty da halyqaralyq reıtıngide pozıtsııasyn jaqsartty. Bıyl tórt satyǵa kóterilip, 61-orynǵa turaqtady. Qazaqstan azamattary 78 elge vızasyz bara alady. Bul kórsetkish boıynsha elimiz Bolıvııa men Sýrınammen qatar tur.
Reıtınginiń 20 jyldyq tarıhynda eń úlken ósý kórsetkishi Birikken Arab Ámirlikterine tıesili. 2006 jyldan beri bul el 57 satyǵa kóterilip, 149 memleketpen vızasyz qatynas ornatty. Atalǵan jetistik Ámirlikterdiń syrtqy saıasatynyń belsendiligi men vızalyq talaptardy jeńildetýiniń nátıjesi retinde baǵalandy.
2025 jyly eń kóp oryn joǵaltqan el – Ulybrıtanııa. Bir jyl ishinde olar 8 memleketpen vızasyz qatynastan aıyryldy.
Eske salsaq, osyǵan deıin Qyrǵyzstan AQSh azamattary úshin vızasyz rejımdi qaıta qaraýdy usynǵanyn jazǵan edik.