Helloýın qandaı mereke?
ASTANA. QazAqparat - «Qastandyqpen oınaý adamnyń ómirine keri áser beredi», al Helloýın bolsa, «zulymdyq pen zorlyq kóp tanytylatyn zaıyrly festıvalge aınalyp ketkenine kóp ýaqyt boldy», dep eskertedi din ókilderi. Bul týraly RIA Novostı jazyp otyr.
Qazannyń 31-nen qarashanyń 1-ine qaraǵan túni álemdegi barlyq adamdar AQSh pen Kanadanyń sońynan erip, búginde máni men maǵynasyn kóbi túsine bermeıtin Helloýın - putqa tabyný merekesin atap ótýge daıyndalýda.
Din jáne qoǵam qaıratkerleri ony «kommertsııalyq joba» men «mádenı otarlaý» quraly dese, pedagogtar men psıhologtar «zulymdyq beınesimen oıyndardyń» ásirese, jas balalardyń jetilmegen psıhıkasyna qaýip tóndirýi múmkin dep qorqyp otyr. Búginde qoǵamymyzda úı arýaqtary jáne taǵy sol sııaqty suryqsyz atrıbýttarmen belgili Helloýındi atap ótkisi keletinderge maskarad kostıýmderin satyp alýǵa, «kóńildi keshter», túngi klýbtardaǵy «qorqynysh bı keshteri» jáne «frık-baldarǵa», túrli Helloýın-kvestteri, tipti, «úreı salatyn velojarysqa» qatysýǵa shaqyryp jatyr. Adamdar onda barynsha kóńil kóterýge tyrysyp, shyn máninde ne toılap otyrǵanyn da túsinbeýde. Helloýınniń túp-tamyry Brıtanııa men Irlandııa elderin mekendegen ejelgi keltterdiń zamanynda jatyr. 1 qarashaǵa eń jaqyn aı tolǵan túni olar «jazdyń sońy» degendi bildiretin Samaın meıramyn toılaıtyn. Keltter Samaın kezinde adam men rýhtar áleminiń arasyndaǵy bóget joıylyp, jaqsy rýhtar da, zulym rýhtar da jerdi kezip júredi dep senetin. Sondaı-aq olar ólilerdiń rýhtary óz úılerine qaıta keledi dep eseptep, olarǵa jaǵý úshin as-sý ázirlep qoıatyn. Sondyqtan búginde arýaq ne mystan bolyp kıingen balalar úıme-úı júrip, birdeńe bermese, tálkek qylyp sazaıyn tartqyzamyz dep úı ıelerin qorqytýlarymen ózderi ańdamaı Samaın meıramy joralarynyń qaıta jańǵyrýyna úles qosady.
HІH ǵasyrda Irlandııa men Shotlandııa ımıgranttary bul merekeni Amerıkaǵa ákeldi. Tek ótken ǵasyrdyń 1920 jyly Nıý-Iork pen Los-Andjeles qalalarynda alǵash ret resmı toılandy. Kele-kele Helloýınde aǵashtardy órteý, shamdardy syndyrý sekildi usaq buzaqylyqtar sánge aınala bastady. 1950 jyldardan bastap Helloýın kommertsııalyq turǵydan paıda ákele bastady. Kostıýmder, áshekeıler, ashyqhattar jáne basqa da zattar óte joǵary suranystarǵa ıe bola bastady. AQSh pen Kanadada toılanyp kelgen jańasha sıpattaǵy Helloýın búginde Eýropa men basqa da qurlyqtarǵa qanatyn jaıa bastady.
