«Helen» daýyly AQSh-ta álek salyp jatyr

ASTANA. KAZINFORM – «Helen» daýyly Florıda jaǵalaýyna jetip, Djordjııa men Ońtústik Karolınaǵa bet aldy. Qaza tapqandar bar. Bul týraly NBC News habarlaıdy.  

4-shi sanattaǵy daýyl kezinde Florıdanyń soltústigindegi Bıg-Bend aımaǵynda jeldiń maksımaldy jyldamdyǵy 140 mılge (225,3 km/saǵ) jetti.

Atap ótilgendeı, tolqyndardyń bıiktigi 20 fýtqa (6 metr) jetken. Levı okrýgine qarasty Sıdar-Kı qalasyndaǵy Ulttyq muhıt qyzmetiniń tolqyn ólshegishi sý deńgeıiniń ortasha tolqynnan 8,68 fýt (2,6 metr) joǵary ekenin habarlady, bul shtatta sý tasqynyna sebep boldy.

Florıdanyń 67 okrýginiń 61-inde tótenshe jaǵdaı jarııalandy, al birneshe okrýgte evakýatsııalaý týraly buıryq berildi.

Power Outage.us saıtynyń málimetinshe, Florıdada 1 036 553 úı men kásiporyn elektr qýatynsyz qaldy.

Daýyldardy baqylaý Ulttyq ortalyǵynyń habarlaýynsha, Florıda shtatynyń Perrı-Folı áýejaıynda jeldiń ekpini 99 mılge (159 km/saǵ) jetkeni tirkelgen.

Florıda shtatynyń Tampa qalasynda kóligine belgi qulaǵan bir júrgizýshi qaıtys boldy.

Alapat daýyl Djordjııanyń ońtústigine qaraı bet alyp, maksımaldy turaqty jeldiń jyldamdyǵy saǵatyna 110 mılge jetedi, bul «Saffır-Sımpson» daýyldar shkalasy boıynsha 2-shi sanatqa sáıkes kelip otyr.

Djordjııanyń ońtústigindegi Valdosta, Tomasvıll jáne Kýıtman qalalary «ekstremaldyq jel týraly eskertý» aldy. Turǵyndarǵa dereý jabyq ǵımarattar nemese baspanalarǵa kóshýge keńes berildi.

Djordjııa shtatynyń Ýıler okrýginde qatty jel jyljymaly úıdi aýdaryp tastap, saldarynan eki adam qaza tapty.

Prezıdent Djo Baıden Ońtústik Karolınada tótenshe jaǵdaı jarııalaýdy maquldap, shtat úshin 40-tan astam okrýgte «Helen» daýylyna áreket etý maqsatynda federaldy resýrstardy bólýdi buıyrdy.