HeadHunter: Qazaqstandyqtar jumys isteýge Atyraý, Mańǵystaý jáne Aqtóbe oblystaryn eń tartymdy aımaqtar dep tańdady
ASTANA. QazAqparat - «HeadHunter Qazaqstan» zertteýshileri hh.kz portalynda jumys izdeýshilerdiń 2014 jylǵy rezıýmelerin saraptaǵan. Onda qazaqstandyqtar qaı óńirge jumys isteýge barǵysy keletinderin anyqtaldy.
Zertteýge sáıkes, árbir onynshy (9,3%) qazaqstandyq Astanaǵa kóship ketýge daıyn. Almatyǵa qonys aýystyrýǵa nıet tanytqandar shamamen eki esege tómen - 5,3%. Aımaqtar arasynda eń tartymdylardyń qatarynda Atyraý (1,6%), Mańǵystaý (1,3%), Aqtóbe (0,7%) jáne Qaraǵandy (0,7%) oblystary tur. Kerisinshe, Jambyl, Qyzylorda jáne Soltústik Qazaqstan oblystaryna jumysqa ornalasýǵa barar edim degenderdiń sany az (0,2%). Almaty, Qostanaı, Aqmola jáne Shyǵys Qazaqstan oblystary 0,3 paıyzdan alyp otyr.
«Astana men Almaty - bizdiń eldiń eń iri bıznes-ortalyqtary. Sondyqtan dál osy qalalarǵa degen suranystyń joǵary bolýy qısyndy. Batys Qazaqstan - qarqyndy damyp kele jatqan aımaq. Ásirese munaı-gaz, qurylys, teńiz jáne balyq sharýashylyǵy, týrızm salasyndaǵy mamandar úshin tartymdy», - deıdi «HeadHunter Qazaqstan» kompanııasynyń PR jáne marketıng boıynsha dırektory Ásel Bajenova.
Jyl basynan 13 tamyzǵa deıin ótkizilgen zertteý barysynda hh.kz saıtyndaǵy 281 327 rezıýme saraptamadan ótti.
