«Haziret Sultan» meshitine órtten qatty zııan tıgen joq - Qazaqstan musylmandary dinı basqarmasy
ASTANA. 18 qańtar. QazAqparat /Rýslan Ǵabbasov/ - «Haziret Sultan» meshitine órtten qatty zııan tıgen joq.
Bul týraly Qazaqstan musylmandary dinı basqarmasynyń baspasóz qyzmetinen málim etti.
«Birneshe kún buryn Astana qalasyndaǵy «Haziret Sultan» meshitin órt shaldy degen habar búkil eldi ýaıymǵa salǵan bolatyn. Mamandardyń pikirinshe, meshitke tilsiz jaýdan aıtarlyqtaı zııan kelmegen. Aldymen meshit ishindegi qurylysta paıdalanylyp jatqan temir minbeniń ústindegi taqtaı aǵashtar janǵan. Tutanyp ketken ottyń jalyny kúmbezdiń astyndaǵy tez janǵysh sándik materıaldardy shalǵan. Syrtqa býdaqtap shyqqan kóp tútin negizinen osy zattardan shyqqan kórinedi. Órttiń shyǵý sebepteri áli de anyqtalýda», - deıdi baspasóz qyzmeti.
Eske salaıyq, elordada jańadan salynyp jatqan «Haziret Sultan» meshitinde órt 15 qańtar kúni boldy. Tótenshe jaǵdaı týraly habar saǵat 15.19-da tústi. Qutqarýshylar oqıǵa ornyna 10 mınýttan soń jetip, órtke oranǵan ǵımarattan 13 adamdy aman-esen alyp shyqty. Tilsiz jaýdy aýyzdyqtaýǵa TJD-niń 171 qyzmetkeri men 35 tehnıkasy jumyldyryldy. 800 sharshy metr aýmaqty sharpyǵan jalyn saǵat 17.49-da tolyǵymen aýyzdyqtaldy.
