«Haıvıll» keńsesindegi órtke qatysty TJD túsinikteme berdi
ASTANA. QazAqparat - Astanada «Haıvıll Qazaqstan» keńse ǵımaratynyń órtenýine qatysty qalalyq Tótenshe jaǵdaılar departamenti túsinikteme berdi, dep habarlaıdy QazAqparat tilshisi.
«Keshe keshke 21 saǵat 11 mınýtta «101» pýltine HighVill Kazakhstan keńsesi ǵımaratynda órt shyqqany týraly habar tústi. Oqıǵa ornyna órt sóndirý qyzmeti jetkende, eki qabatty ǵımaratty qalyń tútin basqan jáne órt bolyp, ǵımarattyń ishki konstrýktsııasy qulaǵany anyqtaldy», - dedi Astana qalasy TJD basshysynyń orynbasary Meırambek Qaısanov.
Onyń aıtýynsha, tilsiz jaýdyń órshýine ǵımarattaǵy tez janǵysh USB-panel, penopalastan jáne plastıkten jasalǵan dekoratsııalyq maketter sebep bolǵan.
«Órt saǵat 22:45-te aýyzdyqtalyp, 01:42 ketkende tolyǵymen joıyldy. Órt shalǵan aýmaq 1500 sharshy metrdi quraıdy. Ony aýyzdyqtaýǵa barlyǵy 25 birlik tehnıka jáne jeke quramnan 95 maman jumyldyryldy. Qaza bolǵandar men zardap shekkender joq», - dedi ol.
Departament basshysynyń orynbasary málim etkendeı, qazirgi ýaqytta oqıǵa ornynda órt-synaq qyzmeti jumys isteýde.
«Órt ǵımarattyń ishinen bastalǵan, biraq neden shyqqany ázirge belgisiz. Jalpy atalǵan nysan 2005 jyly paıdalanýǵa berildi. Ol jerde órtke qarsy tekseris sońǵy ret 2012 jyly júrgizildi. Kásipkerlik kodeksine sáıkes, jospardan tys órt qaýipsizdigine qatysty aryz-shaǵym túskende ǵana teksere alamyz. Taǵy bir aıta keterligi, bul keńse kópshilik baratyn ǵımarattar sanatyna jatpaıdy», - deıdi M. Qaısanov.
Eske salsaq, oryn alǵan órt oqıǵasy týraly keshe habarlaǵan bolatynbyz.
Kóp ýaqyt ótpeı tilsiz jaýdyń sóndiriligeni jóninde aqparat berildi.
