«Haıvıl Astana» turǵyn úı kesheniniń qurylysyn aıaqtaýdy kózdeıtin úshjaqty memorandýmǵa qol qoıyldy
ASTANA. Naýryzdyń 3-i. QazAqparat /Ernur Aqanbaı/ - Búgin Astanada «Samuryq-Qazyna» jyljymaıtyn múlik qory» AQ, «BTA banki» AQ jáne «Highvill Kazakhstan» JShS «Haıvıl Astana» turǵyn úı kesheniniń qurylysyn (D blogy) aıaqtaýdaǵy ózara yntymaqtastyq týraly úshjaqty memorandýmǵa qol qoıdy,
dep habarlaıdy QazAqparat.
«Samuryq-Qazyna» qory baspasóz qyzmetiniń málimetinshe, memorandým - taraptardyń uzaq merzimdi ózara tıimdi yntymaqtastyǵyn nyǵaıtýǵa baǵyttalǵan. Ol bolashaq mámileniń negizgi, mańyzdy parametrlerin belgileıdi. Budan keıin bul parametrlerdi -Jyljymaıtyn múlik qory men BTA bankiniń aktsıoneri - «Samuryq-Qazyna» ál-aýqat ulttyq qory bekitedi. Sonymen qatar, qurylystyń ózindik quny joǵary ári nysan klasynyń (qazirgi turǵyn úı keshenderi salynar kezde ekonom, bıznes, sotsıal klastarǵa bólinedi) joǵary bolýyna baılanysty bul mámile QR Úkimetiniń tarapynan maquldaýdy talap etedi. Sharttardy bekitkennen keıin úlestik qatysý shartyn jasaý josparlanýda. Ol shart BTA bankiniń kredıttik resýrstaryn, Ulttyq qor qarajatynyń qaıtarylýyn qamtamasyz etý úshin jáne obektidegi úılerdi ashyq naryqta erkin satýdy kózdeıdi. «Jyljymaıtyn múlik qory Basqarma tóraǵasy Ǵosman Ámrınniń pikirinshe, bul jobany memleket qarajaty esebinen qarjylandyrý sheteldik ınvestorlar úshin jaqsy nyshan bolmaq. Óıtkeni, olardyń qarjylyq daǵdarys kezinde asa saq qımyldap otyrǵany belgili», delingen baspasóz qyzmetiniń málimetinde.
