Haıýanattar baǵynan 5 qasqyr qashyp ketti
ASTANA. 27 qarasha. QazAqparat - Ulybrıtanııada Kolchester haıýanattar baǵynan 5 qasqyr qashyp ketti. Qasqyrlardyń bireýi trankvılızator kómegimen uıyqtatylyp, qaıta qamaldy.
Ekeýin atyp tastady. Endi bireýi torǵa ózi qaıtyp keldi. Keıinirek jalǵyz qalǵan besinshi qasqyrdy polıtsııa qyzmetkerleri tikushaq arqyly taýyp, atyp óltirdi.
Haıýanattar baǵynyń qyzmetkerleri bul áreketterin jabaıy ańdardyń qaýip tóndiretindigimen túsindirdi, dep habarlady Bı-Bı-Sı.
Ańdar 26 qarasha kúni tańerteń qashyp ketken. Olardyń syrtqa shyǵýyna qasqyrlar turatyn qorshaýdyń buzylýy sebep bolýy múmkin dep boljanyp otyr.
