«Haıshen» taıfýny saldarynan Japonııada 430 myńǵa jýyq úı jaryqsyz qaldy
TOKIO. BBC - QazAqparat – Japonııada «Haıshen» taıfýny saldarynan Kıýsıý aralynda 430 myńǵa jýyq úı elektr jaryǵynsyz qaldy, dep habarlaıdy QazAqparat BBC agenttigine silteme jasap.
Bılik aldyn-ala jaǵalaýdaǵy qalalardan eki júz myńnan astam adamdy evakýatsııalaý týraly buıryq berdi. Japonııanyń batys prefektýralaryndaǵy zaýyttar, mektepter, dúkender, kásiporyndar jabyldy. Júzdegen áýe reısi, sondaı-aq temirjol baılanysy toqtady.
Sondaı-aq Reseıdiń Prımore ólkesi men Koreıa túbeginde de apatqa daıyndyq júrip jatyr.
Birneshe kún boıy Japonııanyń ońtústik araldaryna qaraı jyljyp kele jatqan «Haıshen» taıfýny jeksenbide aıtarlyqtaı kúsheıip, Máskeý ýaqytymen shamamen 13.00-de jaǵalaýǵa jetti.
Japonııa meteorologııalyq ortalyǵynyń basshysy Ioshıhısa Nakamoto Haıshenniń óz kúshin áli de joǵaltpaǵanyn eskertti.
Oıpatty aýdandarda, ásirese ózen saǵalarynda, kúshti sý tasqyny bolýy múmkin.
«Haıshen» - sýpertaıfýn, onyń ortalyǵyndaǵy jeldiń jyldamdyǵy sekýndyna 80 metrge nemese saǵatyna 290 km-ge jetedi.
Reseılik Prımorede «Haıshen» dúısenbi-seısenbi kúnderi de bolady degen boljam bar. Onda Tótenshe jaǵdaılar mınıstrliginiń kúshteri joǵary daıyndyq rejımine kóshken.
Bul – sońǵy aptada Japonııada bolǵan ekinshi kúshti taıfýn.
Munda birneshe kún buryn «Maısak» taıfýny bolǵan edi, bul – aımaqtaǵy sońǵy jyldardaǵy eń qatty soqqan daýyldardyń biri.
