Haınanda nóser jaýynǵa baılanysty eń joǵary qaýip deńgeıi jarııalandy

BEIJІŃ. QazAqparat – Sársenbide Haınan provıntsııasynyń (Ońtústik Qytaı) Sanıa kýrorttyq qalasynda araldaǵy nóser jaýynǵa baılanysty qaýiptiń eń joǵary qyzyl deńgeıi jarııalandy, dep habarlaıdy QazAqparat menshikti tilshisi.

Sanıa qalalyq Bilim berý isi basqarmasynyń málimeti boıynsha, sársenbi kúni, 7 maýsymda balabaqshalar kúni boıy jabyq bolady, al bastaýysh jáne orta mektepter jarty kún jumys isteıdi.

Sanıa qalalyq meteorologııalyq qyzmeti sársenbide nóser jaýynǵa baılanysty qaýip deńgeıin qyzǵylt sary tústen eń joǵary qyzyl deńgeıge kóterdi. Birneshe saǵatta qalanyń jekelegen aýdandarynda 156 mm jaýyn-shashyn jaýǵan.

Sanıa qalasynda tolassyz jaýyn saldarynan qandaı da bir jaǵdaı bolǵany týraly ázirge málimet túspedi.

Osy jyly mamyr aıynyń sońynda Henan provıntsııasynda (Ortalyq Qytaı) nóser jaýyn jaýdy. Sonyń saldarynan bıdaı alqabyna zaqym kelgen. Osynyń saldaryn joıý úshin QHR Qarjy mınıstrligi men Aýyl sharýashylyǵy jáne aýyl isteri mınıstrligi $28,21 mln qarjy bóldi. Qarajat tabıǵı apat saldarynan bolǵan shyǵyndy azaıtý úshin, ıaǵnı aýylsharýashylyq tehnıkasy men dymqyl astyqty keptirip, egindi jınaýǵa jumsalatyny habarlandy.

QHR-da tabıǵı apat týraly halyqqa eskertýdiń tórt deńgeıi bar: kók, sary, qyzǵylt sary jáne qyzyl tús.