Haınan aralynda Boao Azııa forýmy bastaldy
BAF dástúr boıynsha baspasóz konferentsııasynan bastalyp, uıymdastyrýshylar Azııa aımaǵyndaǵy áleýmettik-ekonomıkalyq jaǵdaı týraly eki baıandama jasady.
Tórt kúnge josparlanǵan forým barysynda 50-ge jýyq is-shara ótedi.
BAF-tyń ashylý saltanaty 30 naýryzda ótedi, oǵan QHR Memlekettik keńesiniń jańa premeri Lı Tsıan, basqa elderdiń úkimet basshylary men iri halyqaralyq uıymdar qatysady.
«Belgisizdik – búgingi álemniń aıqyndaýshy sıpaty. Bul belgisizdik birqatar mańyzdy qıyndyqtarmen erekshelenedi. Koronavırýs pandemııasy, geosaıası qaqtyǵystar, álemdik ekonomıkanyń quldyraýy nemese jahandyq jylyný, bul syn-qaterlerdiń kez-kelgeni tek búgingi kúndi ǵana emes, bolashaqty da qamtıdy. Osy syn-qaterler jaǵdaıynda halyqaralyq qoǵamdastyq belsendilik tanyta bastady jáne yntymaqtastyqty nyǵaıtýǵa jáne damýǵa yqpal etýge umtylýda», - dedi BAF-tyń bas hatshysy Lı Baodýn brıfıngte.
Sondaı-aq forým aıasynda «ekonomıkalyq damý jáne qaýipsizdik», «týrızm», «jasyl qalany damytý», «densaýlyq» jáne «ǵylymı-tehnıkalyq ınnovatsııalar» syndy taqyryptarda konferentsııalar ótedi.
Forým alańdarynda klımattyń ózgerýine jahandyq den qoıý, kómirtegi beıtaraptyǵyna qol jetkizý jáne «Beldeý jáne jol» bastamasynyń joǵary sapaly qurylysy máseleleri qozǵalady.
BAF - 2023 oflaın rejıminde ótedi. Forýmda 50-den astam el men aımaqtan 2 myńǵa jýyq resmı qatysýshy, sondaı-aq 40 el men aımaqtan 170-ten astam medıa uıymdardyń atynan 1,1 myńnan astam jýrnalıst tirkelgen. Pikirtalastarǵa álemniń túkpir-túkpirinen 90-nan astam saıasatker men Úkimet músheleri, halyqaralyq jáne aımaqtyq uıymdardyń 11 basshysy, bedeldi ǵalymdar men saıasattanýshylar jáne iri halyqaralyq korporatsııalardyń ókilderi qatysady.
Forýmnyń qurmetti qonaqtary retinde Halyqaralyq valıýta qorynyń (HVQ) basqarýshy dırektory Krıstalına Georgıeva, ekonomıkalyq yntymaqtastyq jáne damý uıymynyń (EYDU) Bas hatshysy Matıas Korman, Shanhaı Yntymaqtastyq Uıymynyń (ShYU) Bas hatshysy Chjan Mın, Ońtústik-Shyǵys Azııa memleketteri qaýymdastyǵynyń (ASEAN) Bas hatshysy Kao Kım Horn jáne basqalar bolady.
Esterińizge sala keteıik, koronavırýs pandemııasyna baılanysty 2020 jyly BAF-tyń jyl saıynǵy kezdesýi toqtatylyp, 2021 jyly ótkizildi. Buǵan deıin BAF jyl saıynǵy is-sharasy tek 2003 jyly, QHR-da atıpııalyq pnevmanııa órship turǵan kezde toqtatylyp, qarashaǵa aýystyryldy.
2022 jyly BAF otyrysy tarıhta alǵash ret jabyq júıede ótti. Barlyq forým qatysýshylary oqshaýlanǵan qonaqúılerden BAF konferentsııasy ótetin jerge jetkizildi.
Bıylǵy forýmda koronavırýs synaǵyn tek BAF ashylý saltanatyna jáne is-shara aıasynda josparlanǵan joǵary deńgeıdegi ekijaqty kezdesýlerge qatysýshylar ǵana tapsyrady.
2001 jyly negizi qalanǵan Boao Azııa forýmy – 29 memleket, onyń ishinde Qazaqstan da bastamashy bolǵan halyqaralyq uıym.