«Havala» arqyly aqsha aýdarǵan: Qazaqstanda iri temeki kontrabandasy áshkerelendi
ASTANA. KAZINFORM — Jambyl oblysynda Qazaqstan aýmaǵyna tańbalanbaǵan temeki ónimderin zańsyz ákelip, ótkizýmen aınalysqan transulttyq uıymdasqan qylmystyq toptyń qyzmeti toqtatyldy.
Qarjylyq monıtorıng agenttiginiń Jambyl oblysy boıynsha departamenti prokýratýranyń úılestirýimen júrgizgen tergeý barysynda qylmystyq toptyń Qyrǵyz Respýblıkasynan temeki ónimderin zańsyz jetkizý arnasyn uıymdastyrǵany anyqtalǵan.
Tergeý málimetinshe, Jambyl oblysynyń turǵyny zańsyz ákelingen ónimderdi ózine baǵynyshty adamdar arqyly taratqan. Kontrafaktilik temekiler Taraz qalasyndaǵy saýda oryndarynda satylyp, sondaı-aq Almaty, Shymkent qalalaryna jáne Qaraǵandy, Aqtóbe, Shyǵys Qazaqstan, Túrkistan oblystaryna jóneltilgen.
— Tintý sharalary barysynda zańsyz aınalymnan jalpy quny 293 mln teńgeden asatyn 319 myńnan astam qorap tańbalanbaǵan temeki ónimi tárkilendi. Tólenbegen aktsızder kólemi 115 mln teńge bolǵan, — delingen habarlamada.
Vedomstvonyń málimetinshe, qylmystyq top quramynda taýar jetkizý men ózara esep aıyrysýdy qamtamasyz etken Qyrǵyzstan azamattary da bolǵan.
Qarjy aǵyndaryn jasyrý úshin kúdiktiler banktik júıeden tys aqsha aýdarýǵa múmkindik beretin beıresmı «Havala» esep aıyrysý júıesin paıdalanǵan.
Sot sanktsııasymen temeki ónimderin tasymaldaýǵa qoldanylǵan úsh kólikke tyıym salyndy. Bes kúdikti qamaýǵa alyndy.
Qazirgi ýaqytta tergeý jalǵasyp jatyr. Qylmystyq is boıynsha ózge aqparat Qylmystyq-protsestik kodekstiń 201-babyna sáıkes jarııalanbaıdy.
Eske salaıyq, buǵan deıin Qazaqstanǵa 500 mln teńgeniń veıpin zańsyz ákelmek bolǵandar ustalǵanyn habarlaǵanbyz.
