«Haýs-master» – Qazaqstan kolledjderi jańa mamandyqqa oqyta bastady

ASTANA. QazAqparat – Qazaqstanda alǵash ret «Haýs-master» biliktiligi boıynsha kadr daıarlaý bastaldy. Bul týraly Oqý-aǵartý mınıstrligi Tehnıkalyq jáne kásiptik bilim departamentinen málim etti, dep habarlaıdy QazAqparat.

Almaty qurylys-tehnıkalyq kolledjiniń bazasynda jańa mamandyq boıynsha 25 adam bilim alýdy bastap ketken.

Departament dırektory Ernat Júnisovtyń aıtýynsha, stýdentter elektr-gazben dánekerleýshi, santehnık jáne jaryqtandyrý júıelerin montajdaý quzyretteriniń keń aýqymy boıynsha bilim alady.

«Haýs-master biliktiligi boıynsha mamandardy daıarlaý oqý ornynyń basym baǵyty bolady. Jańa tásil turǵyn úı-kommýnaldyq sharýashylyq salasyndaǵy mamandardyń kásibıligi men quzyrettiligin arttyrady. Sebebi kópqabatty turǵyn úılerdi salý jáne paıdalanýǵa berý ózekti máselelerdiń biri», - deıdi Ernat Júnisov.

Mınıstrlik málimetinshe, atalǵan biliktilik «PROMHOUSE – Qazaqstan men Ózbekstanda turǵyn úı qoryn basqarýdy kásibılendirý» jobasy aıasynda júzege asyrylyp jatyr.

Aıta keteıik, jańa biliktilik boıynsha oqytý Almaty jáne Astana qalalarynda, Aqmola, Shyǵys Qazaqstan oblystarynda júrgiziledi.