Hatshylyqtan tergeýshige aınalý úshin únemi izdenis ústinde boldym – polıtsııa maıory Olga Omarova
AQTÓBE. QazAqparat – Embi polıtsııa bóliminiń aǵa tergeýshisi Olga Omarova shırek ǵasyrdan astam ýaqyttan beri quqyq qorǵaý salasynda eńbek etip júr. Ol óz qyzmetin qarapaıym hatshylyqtan bastady. Qazir polıtsııa maıory, bilikti tergeýshi, dep habarlaıdy QazAqparat tilshisi.
Mańjasar men Nadejda Omarovtar bes qyz tárbıeledi. Olga Omarova bir otbasynyń tuńǵyshy. Ol Aqtóbe oblysy, Muǵaljar aýdany, Orqash aýylyna qarasty Qaralatsaı fermasynda ómirge kelgen. Ákesi mehanızator, anasy kitaphanashy boldy.
«Bir otbasynyń úlkeni bolǵan soń bizge artylǵan jaýapkershilik te joǵary bolady. Ákem men anam jumysqa ketkende úı sharýasy, mal baǵý, qusqa jem berý, baý-baqsha men baýyrlarymnyń tirligi maǵan júkteldi. Sodan bolar, men kópshilmin, baýyrmalmyn. Árqaısysyna qamqor bolyp, ata-anamnyń senimi men úmitin aqtaýǵa bar kúshimdi saldym. Mektep bitirip, ári qaraı ne bolady dep oılanyp júrgen shaq edi. 1995 jyly el ishinde daǵdarys beleń alyp, qıyn kezdi bastan ótkerdik. Sondaı bir kúnde ákemniń dosy maǵan aýdandyq polıtsııa bóliminde hatshy bolyp jumys isteýdi usyndy. Ol jerde bos oryn bolyp, men kelistim», - dep eske alady Olga Omarova.
Ol Embi qalasyndaǵy polıtsııa bólimine jumysqa ornalasty. Polıtsııa, anyqtaýshy, tergeýshi qyzmetine osy kezden bastap qyzyǵyp, ómirin jańa mamandyqpen toǵystyrdy.
«Aýyldan qalaǵa kelip, jańa qyzmetke kiristim. Men úshin arnaıy forma kelgen, bir isti alyp, qylmysty ashýǵa jan-jaqty kirisken adamdary qyzyq kórindi. Sóıtip óz jumysymmen qatar tergeýshilerdiń is-áreketin baqylaýǵa den qoıdym. Kúdiktini ákelgen kezde olarǵa suraq qoıý, jaýap alý sátin kórdim. Keıde oqıǵa ornyna erip baramyn. Mine, bul meniń mamandyq tańdaýyma tirkeleı áser etti. Aldymen pedagog, keıin zańger mamandyǵyn ıgerip, Muǵaljar aýdanynyń Embi qalalyq polıtsııa bólimshesiniń tergeýshisi qyzmetine kiristim», - dedi ol.
Qazir aǵa tergeýshiniń qorjynynda kez kelgen sanattaǵy is bar. Ol aýyr jáne onsha aýyr emes isterdi, kisi óltirý faktisin tergep, ashty. Bir qýantarlyǵy, Olga Omarova barlyq qylmystyq isti qazaq tilinde júrgizedi. Jumys kestesi týraly suraǵanymyzda úıine óte kesh baratynyn, biraq tańdaýyna ókinbeıtinin aıtty. Al qyzmet kýratory, Aqtóbe oblystyq polıtsııa departamenti bastyǵynyń orynbasary Samat Aısov onyń jumysyna tánti.
«Oblystyń shalǵaı aýdanynda júrse de ol árdaıym aldyńǵy qatarda, kez kelgen adamǵa kómek kórsetedi», - dedi Samat Aısov.
Bir erekshiligi, Olga Omarova kóshet otyrǵyzyp, kútim jasaǵandy unatady. Bala kezinde úırengenin esten shyǵarmaı, 2010 jyldyń kókteminde aýdandyq polıtsııa bóliminiń aýlasyna óz qolymen qaraǵaı otyrǵyzdy.
«Taǵdyr árqıly bolady. Bir kúni jol apatyna ushyrap, aýrýhanaǵa tústim. Sol kezde men sekildi jol-kólik apatyna tap bolǵan jigitpen tanystym. Sodan keıin Jumaǵalı Rahmanov ekeýmizdiń jubymyz jazylǵan emes. Jumaǵalı vahtalyq ádispen jumys isteıdi, Sondaı-aq ol minsiz kúıeý, qamqor jáne meniń qyzmetime túsinistikpen qaraıdy. 8-naýryzda árqashan bizdi tań qaldyrýǵa tyrysady, tamaq daıyndaıdy, fortepıanoda oınaıdy nemese án aıtady. Ol ózin-ózi damytyp júredi. Óte talantty. Meniń ómir jolymda osyndaı adamnyń kezdeskenine qýanyshtymyn. Onyń qoldaýynyń arqasynda men ózimdi súıikti jumysyma jáne adamdarǵa qyzmet etýge arnaı alamyn», - dedi Olga Omarova.
