Hatamı: AQSh-tyń Úndi muhıtynda Iran kemesine jasaǵan shabýyly jaýapsyz qalmaıdy
ASTANA. KAZINFORM – Iran armııasynyń qolbasshysy, general-maıor Amır Hatamı AQSh-tyń Úndi muhıtynda ırandyq áskerı-teńiz kemesine jasaǵan shabýyly jaýapsyz qalmaıtynyn málimdedi. Shabýyl saldarynan 104 teńizshi qaza tapqan. Bul týraly Irannyń IRNA aqparat agenttigi habarlady.
Amır Hatamı Úndistanda ótken halyqaralyq oqý-jattyǵýlarǵa qatysqannan keıin qarý-jaraqsyz kúıde eline qaıtyp kele jatqan Iran áskerı-teńiz kúshteriniń IRIS Dena kemesine jasalǵan shabýylǵa qatysty pikir bildirdi.
Hatamı amerıkalyq soqqy saldarynan 104 ırandyq teńizshi qaza tapqanyn habarlady.
– Búgin Úndi muhıtynyń sheksiz kók aıdyny osy sýlardyń tolqynymen úndesip, týǵan jerine degen súıispenshilikke toly júrekteri bar uldardyń qaıǵysy men erliginiń kýási boldy. Dena kemesiniń batyl teńizshileri onyń berik dińgekterinde Irannyń maqtanysh týyn kóterip, elge qaıtyp kele jatqan jolda adam quqyqtaryn jalǵan qorǵaýshylardyń qorqaq óshpendiliginiń nysanasyna aınaldy, — dedi ol.
Hatamıdiń aıtýynsha, Dena kemesiniń teńizshileri teń jaǵdaıda ótken shaıqasta emes, eń úlken ádiletsizdiktiń qurbany boldy.
– Bul 104 qyzǵaldaqtyń taza qany jaýapsyz qalmaıdy, — dep málimdedi qolbasshy.
Irannyń IRIS Dena fregatyna Úndi muhıtynyń halyqaralyq sýlarynda amerıkalyq súńgýir qaıyqtan atylǵan torpeda tıgeni habarlandy. Keme Úndistanda ótken «Mılan-2026» oqý-jattyǵýyna qatysyp, elge qaıtyp kele jatqan.
Buǵan deıin Iran bıligi keme qarý-jaraqsyz bolǵanyn jáne shabýyl saldarynan 104 ırandyq teńizshi qaza tapqanyn málimdegen.
Eske sala ketsek, Tramp Iranmen kelissóz júrgizý týraly usynystardy qabyldamady.
