«HasSaq» ansambli World Folk Vision baıqaýynyń júldesin ıelendi
ASTANA.QazAqparat - Qazaqstandyq «HasSaq» etno-folklorlyq ansambli Reseıdiń Sochı qalasynda ótken «World Folk Vision» mýzykalyq baıqaýynda júldege ıe boldy, dep habarlaıdy QazAqparat ansambldiń qobyzshysy Móldir Erbolǵa silteme jasap.
«Súıinshi, Gran prı!!! Reseıde ótken «World folk vision» álemdik folk mýzyka saıysynyń jartylaı fınalynda óz nomınatsııamyz boıynsha eń joǵarǵy І oryn alyp, 141 qatysýshynyń ishinen sýyrylyp bas júlde qanjyǵaladyq. Sonymen qatar, Saýd Arabııasynda ótetin fınaldyq kezeńge beriletin 3 joldamanyń birin ıelendik! Buıyrsa álemniń 80 (múmkin odan da kóp) elimen jarysyp, qazaqtyń ónerin kórsetemiz», - dep jazdy Móldir Erbol Feısbýktegi paraqshasynda.
Aıta keteıik, «World folk vision» álemdegi eń tanymal folk mýzykalyq festıvali jyl saıyn ótkiziledi. Baıqaýdyń shırek fınaly álemniń ár jerinde ótkiziledi. 2018 jylǵy fınaldyq báseke Saýd Arabııasynyń astanasy Er-Rııad qalasynda uıymdastyrylady.
