«Hassaq» ansambli túriktiń «Uly seljuqtar» serıalynyń mýzykasyn oryndaıdy
Jelide taraǵan bul aqparattyń izimen Qurmanǵazy atyndaǵy qazaq ulttyq konservatorııasynyń Halyq mýzykasy fakýltetiniń dekany, «Hassaq» ansambliniń jetekshisi Erjan Jamankeevti áńgimege tartyp kórgen edik. Toptyń jetekshisi 2016 jyly «Amanat» atty beınebaıan shyqqannan keıin Qazaqstanmen qatar, shet elderde aýdıtorııalary óse bastaǵanyn aıtady.
«Ásirese Túrkııada tyńdarmandarymyz arta tústi. Bizdi ol jaqta «Hassaq qashan keledi eken» dep kútip júrgender kóp. Sol aýdıtorııamyzdyń arqasynda Túrkııadaǵy mýzykanttar men kınorejısserlar da bizdi tanı bastady. Buǵan deıin kınorejısserlerdiń biri «Amanat» kompozıtsııasyn tarıhı serıaldardyń birine qoldansaq dep qolqa salǵan edi», - deıdi telefon arqyly áńgimelesken Erjan Jamankeev.
Onyń aıtýynsha Túrkııadaǵy qalyń tyńdarmanmen birge kınorejısserler de, prodıýsserler de qazaqtyń ulttyq án-kúıine erekshe nazar aýdara bastaǵan. Kınolarǵa mýzyka jazatyn Kerdar esimdi mýzykantpen birigip, «Hassaq» toby seljuqtar týraly tarıhı serıalǵa arnap bir mýzykany jazǵan eken. Odan bólek túrik rejısseri eki albomdaǵy toǵyz shyǵarmany alýdy ótingen.
«Biz avtorlyq ruqsatty berdik. «Uyanys: buyuk selcuklu» («Oıaný: uly seljuqtar») serıaly tórt jyldyq joba eken. Aldaǵy ýaqytta biz ózimizdiń úshinshi albomymyzdy shyǵaramyz. Endi olar sol albomdaǵy týyndylardy surap otyr. Úshinshi albomymyzdyń alǵashqy shyǵarmasyn jiberip qoıdyq. Endi ekeýin joldaımyz», - deıdi top jetekshisi.
«Uyanys: buyuk selcuklu» serıaly seljuqtardyń (túrki-oǵyz áskeriniń sol qanatyn quraǵan qynyq taıpasynan shyqqan áýlet) tarıhynan syr shertedi. Týyndyda seljuqtardyń soǵysý taktıkasy, túrik halqyna ákelgen jeńisteri baıandalady.
«Biz «Hassaq» toby kúnine 10-11 saǵatqa deıin daıyndyq jumystaryn júrgizemiz. Keıde túnge deıin otyryp qalamyz. Alaıda osy eńbektiń jemisin kórip otyrmyz deýge ábden negiz bar. Ónerge baryńmen berilseń – eńbegiń aqtalady. Keıbir shyǵarmalar 6 repıtıtsııadan keıin daıyn bolýy múmkin. Eń jyldam jazyp shyqqan shyǵarmamyz – 3 repıtıtsııada daıyn bolǵan týyndy. Orta eseppen 10-11 repıtıtsııadan bir shyǵarma jaryqqa shyǵady», - degen Erjan Jamankeev toptyń tarıhy jaıly da aıtyp ótti.
Jalpy «Hassaq» toby 2013 jyldyń 1 aqpanynda qurylǵan. Úsh beınebaıan, 11-12 shyǵarmadan turatyn eki taspasy bar. Top quramyndaǵy ónerpazdar – besaspaptar, ıaǵnı mýltıınstrýmentalıster. Bir shyǵarma ishinde top músheleri birneshe aspapty oınaıdy. Arasynda qazaqtyń ulttyq 30 aspabyna deıin oınaıtyn mýzykanttar bar eken.
«Biz kóbinese sheteldemiz. 2019-2020 jyldary ǵana Qazaqstannyń qalalaryna shyǵa bastadyq. Qytaı men Reseıden, Eýropa elderinen kóp shaqyrtý túsedi», - dep túıdi Erjan Jamankeev.
Eske sala ketsek qazaqtyń án-kúıi men dombyrasyna túriktiń rejısserleri men prodıýsserleriniń nazary aýyp kele jatqany buǵan deıin habarlanǵan edi. Túriktiń áıgili aktery Býrak Ózjıvıt basty róldi somdaıtyn serıalda da qobyz tartyp jańaqorǵandyq Erjan Arqabaı jobaǵa qalaı kelgenin aıtqan bolatyn.
