Hashım Tachı Kosovo prezıdenti bolyp saılandy
ASTANA. QazAqparat - Ózin-ózi jarııalaǵan Kosovo Respýblıkasynyń parlamenti syrtqy ister mınıstri Hashım Tachıdi eldiń jańa prezıdenti etip saılady. Bul týraly Associated Press agenttigine silteme jasap Lenta.rý habarlady.
Jańa memleket basshysyn saılaý parlament ǵımaratyndaǵy jáne onyń syrtyndaǵy qarsylyqtar jaǵdaıynda ótti. Oppozıtsıonerler zalda kózden jas aǵyzatyn gaz jiberdi, kóshedegi belsendiler jarylǵysh bótelkeler laqtyrdy.
Oppozıtsııalyq partııalar parlamentti daýys berýdi toqtattyrýǵa tyrysty. Olar qazirgi úkimet, sonyń ishinde Tachı Serbııamen kelisimder aýqymynda ólke aýmaǵyndaǵy etnıkalyq serb azshylyǵyna úlken avtonomııa usynylýyna jol berdi dep renish bildirýde.
Kosovonyń qazirgi prezıdenti Atıfeta ıAhıaganyń mandaty 7 sáýirde aıaqtalady.
Kosovodaǵy prezıdenttiń róli negizinen rásimdik sıpatta. Ókilettik merzimi bes jyl.
Tachı kezinde Kosovony azat etý armııasynyń jasaqtaryn basqardy, odan keıin ártúrli úkimettik qyzmetterde boldy, sonyń ishinde premer-mınıstr qyzmetin atqardy.
2010 jyly Kosovoda adamdar aǵzalaryn satýmen baılanysty janjal ýshyqty. Sol kezde Eýropa keńesiniń adam quqyqtary komıteti 1998-1999 jyldardaǵy Kosovodaǵy soǵys kezinde Kosovony azat etý armııasynyń músheleri adamdar organdaryn jáne esirtki satýmen aınalysty degen baıandama usyndy. Komıtettiń málimetterine sáıkes oǵan Tachıdiń de qatysy bar delindi. Kosovo bıligi bul aıyptaýlardy úzildi-kesildi joqqa shyǵardy.
