«Hasenovtiń isi» boıynsha arnaıy komıssııa quryldy - QR AShM

ASTANA. QazAqparat - Aýyl sharýashylyǵy vıtse-mınıstri Qaırat Aıtýǵanov "Hasenovtiń isi" boıynsha túsinikteme berýden bas tartty. Alaıda atalǵan faktiden keıin arnaıy komıssııa qurylǵanyn jetkizdi, dep xabarlaıdy QazAqparat tilshisi.

"Qazirgi kezde bul ispen quqyq qorǵaý organdary aınalysyp jatyr. Ol veterınarlyq baqylaý jumysyna jaýapty boldy. Meniń bul jerde istegenime 100-aq kún boldy. Basqa eshteńe aıta almaımyn", - dedi Q.Aıtýǵanov búgin agroónerkásip keshenin tanystyrýǵa arnalǵan jıynda.

Al jýrnalısterdiń "Saqtash Hasenovty ustaǵannan keıin mınıstrlikte ishki tekserister bastalǵan joq pa?" degen suraǵyna: "Búginde arnaıy komıssııa quryldy. Ol bizdiń mamandarmen jumys istep jatyr", - dep qysqa ǵana jaýap berdi.
 
 Eske sala ketsek, Sybaılas jemqorlyqqa qarsy is-qımyl ulttyq bıýrosy juma kúni birneshe ret para alǵan QR AShM Veterınarııalyq baqylaý jáne qadaǵalaý komıtetiniń tóraǵasy Saqtash Hasenovti ustaǵan bolatyn. Komıtet tóraǵasy S. Hasenov buryn Mınıstrlikte jumys istegen óziniń senimdi adamy E. Reshetkomen aldyn ala sóz baılasyp, Qazaqstan aýmaǵyna et ónimderin ákelýge ruqsat berý boıynsha qylmystyq shema uıymdastyrǵany anyqtaldy. S. Hasenov belgilengen baǵa boıynsha júıeli túrde para alyp otyrǵan.  Sonymen, Qazaqstan aýmaǵy boıynsha 1 000 tonna qus etin kedergisiz ótkizýge ruqsat bergeni úshin «Hladolend» JShS basshylarynan 5 mln teńge kóleminde kezekti para alý barysynda  Sybaılas jemqorlyqqa qarsy qyzmet S. Hasenov pen E. Reshetkony  ustady. Olar kinálaryn tolyqtaı moıyndady.