Hasan Qasymbaevtyń Sherzat isine qatysy bar ma — advokat jaýaby
QONAEV. KAZINFORM — Talǵar aýdandyq sotynda Hasan Qasymbaev jáne ózge 5 aıyptalýshyǵa baılanysty sot otyrysy ótti.
Aıyptalýshylar oryndyǵynda Hasan Qasymbaev, Rýslan Álıev, Madııar Qalımjanov, Saılaý Aqjanov, Nurmuhammet Sultanbekov, Danııar Asqarov otyr. Olardyń barlyǵyna Qylmystyq kodekstiń úsh baby boıynsha aıyp taǵylǵan — adam urlaý, densaýlyqqa qasaqana aýyr zııan keltirý jáne qorqytyp alý.
Sot otyrysynda jábirlenýshi — fıtnes-jattyqtyrýshy Arman Álıev Qasymbaevpen 2016 jyldan beri tanys bolǵanyn, al qalǵan aıyptalýshylardy alǵash ret qylmys kezinde kórgenin aıtty.
— Meniń tek Hasan Qasymbaevpen ǵana arazdyǵym boldy, al basqalarymen eshqandaı baılanysym bolǵan joq, bilmeımin de, — dedi ol.
Qasymbaevtyń advokaty Erlan Mendeshev óz kezeginde isti toqtatý týraly ótinish bildirdi. Onyń aıtýynsha, is qylmystyq-protsestik zańnamany buza otyryp qozǵalǵan. Qorǵaýshynyń sózinshe, is 2024 jylǵy 25 qazanda zańsyz túrde tirkelgen. Al qalǵan 5 aıyptalýshyǵa qatysty 2024 jyldyń shildesinde QK-niń 125-baby («Adam urlaý») jáne 106-baby («Densaýlyqqa qasaqana aýyr zııan keltirý») boıynsha úkim shyqqan.
Qorǵaýshy bul is boıynsha Qasymbaev 2021 jyldan beri birneshe ret jaýap bergen, bettestirýge qatysqan jáne oǵan qatysty tergeý sol kezde toqtaǵanyn atap ótti.
Al advokat Maýlen Erjanov óz qorǵaýyndaǵy azamattyń taǵylǵan aıyptardy moıyndamaıtynyn aıtty. Onyń sózinshe, Qasymbaevtyń kinási jetkilikti dáleldermen rastalmaǵan, al tergeý barysynda qylmystyq-protsestik kodeks talaptarynyń kóptegen buzýshylyqtaryna jol berilgen.
Buǵan deıin Sherzat Polat isindegi aıyptalýshylardyń múddesin qorǵaǵan Gúlmıra Babajanova iske Hasan Qasymbaevtyń taǵy bir advokaty retinde qatysty. Ol aldyńǵy sottyń Qasymbaev isine esh baılanysy joq ekenin atap ótti. Aıtýynsha, bul iske Sherzat soty aıaqtalǵanynan keıin kirisken.
Alaıda jábirlenýshiler isti toqtatýǵa qarsy shyqty. Jábirlenýshi tarap bul joly ádildik ornaıdy degen úmitte. Sýdıa barlyq ótinish pen málimdemeler aldaǵy otyrystarda qaralatynyn atap ótti.
Eske salaıyq, sot bastalǵannan keıin aıyptalýshylardyń advokattary prokýrordy aýystyrýdy ótindi.
Sýdıa Aınagúl Tuqybaeva bul ótinishti qanaǵattandyryp, memlekettik aıyptaýshy zaldan shyqty. Sot otyrysy ekinshi prokýror — Erlan Qulanbaevtyń qatysýymen jalǵasyp jatyr.
Eske sala keteıik, Hasan Qasymbaev byltyr qarasha qamaýǵa alyndy.