Hasan Qasymbaevqa sot úkimi shyqty

QONAEV. KAZINFORM — Talǵar aýdandyq sotynda Hasan Qasymbaev pen taǵy bes sottalýshyǵa qatysty úkim jarııalandy. 

Hasan Qasymbaevpen birge aıyptalýshylar oryndyǵynda Rýslan Álıev, Madııar Qalımjanov, Saılaý Aqjanov, Nurmuhammet Sultanbekov, Danııar Asqarov otyr.

Olardyń bárine Qylmystyq kodekstiń úsh baby boıynsha aıyp taǵylǵan: adam urlaý, qasaqana aýyr jaraqat salý jáne qorqytyp aqsha alý.

Sot úkimimen Hasan Qasymbaev kináli dep tanylyp, oǵan ortasha qaýipsizdik deńgeıindegi qylmystyq-atqarý júıesi mekemesinde 12 jyl bas bostandyǵynan aıyrý jazasy taǵaıyndaldy.

Іstiń mán-jaıy

Tergeý materıaldaryna sáıkes, aıyptaý eki epızod boıynsha taǵylǵan. Jábirlenýshiler retinde kásipker Áripjan Tájiev pen fıtnes-jattyqtyrýshy Arman Álimov tanylǵan.

Sottaǵy jaǵdaı

Іs qoǵam nazaryn aýdarǵandyqtan, Talǵar aýdandyq sotynyń ǵımaraty kúsheıtilgen kúzetke alyndy. Sot aýmaǵynda jáne syrtynda polıtsııa qyzmetkerleri kezekshilik etti, sot mańyndaǵy qozǵalys ýaqytsha shekteldi.

Sot otyrysyna kóp adam — negizinen aıyptalýshylardyń týystary jınaldy. Zalda keı sátterde aıǵaı-shý baıqaldy. Kisi qarasy kóp bolǵandyqtan, jýrnalıster protsesti kórshiles kabınetten baqylaǵan.

Otyrys kezinde keıbir sottalýshylar beınejazba júrgizýge qarsylyq bildirip, túsirilimdi toqtatýdy talap etken. Olar kúzet turǵan kabınanyń áınegin urǵylaǵan.

Buǵan deıin memlekettik aıyptaýshy Qasymbaevqa — 15 jyl, al qalǵan sottalýshylarǵa 9 jyldan 22 jylǵa deıingi merzim suraǵan bolatyn. 

Eske salaıyq, Hasan Qasymbaev byltyr qarasha aıynda qamaýǵa alyndy.

Hasan Qasymbaevqa adam urlaý, densaýlyqqa qasaqana aýyr zııan keltirý jáne bopsalaý faktileri boıynsha aıyp taǵyldy.

Bas prokýratýra Talǵarda adam urlap, uryp-soǵýǵa qatysty isti qaıta qarady.

Almaty oblysy polıtsııa departamentiniń tergeý basqarmasy osy jyldyń 21 shildesinde isti aıyptaý aktisimen oblys prokýratýrasyna joldaǵan. Al oblys prokýratýrasy 29 shildede is boıynsha qurylǵan aıyptaý aktisin bekitip, isti negizinen qaraý úshin Talǵar aýdandyq sotyna joldady.

Іs boıynsha sot protsesi 20 tamyzda bastaldy. Alǵashqy otyrystardyń ózinde-aq qorǵaýshylar prokýror Nazgúl Táýekenbaıdy isten shettetý týraly ótinish berip, sýdıa Aınagúl Tuqybaeva bul ótinishti qanaǵattandyrǵan edi.

Sot otyrysy ashyq rejımde ótkenimen, buqaralyq aqparat quraldary úshin birqatar shekteý qoıyldy: jýrnalıster sot otyrysyn kórshiles kabınetten beınetranslıatsııa arqyly baqylady.

Keshe, 10 qarashada Hasan Qasymbaev isi boıynsha sottalýshylar sońǵy sózin aıtty.