Hasan Qasymbaevqa qatysty sot aıaqtalýǵa jaqyn
QONAEV. KAZINFORM – Talǵarda Hasan Qasymbaev pen taǵy bes aıyptalýshyǵa qatysty atyshýly sot protsesi aıaqtalýǵa jaqyn.
Búgin, 10 qarashada sottalýshylar sońǵy sózin aıtýǵa tıis. Osy ýaqytta aýdandyq sot ǵımaratynyń aldyna ondaǵan adam – Qasymbaevtyń týystary, jaqyndary men ony qoldaýshylary jınaldy.
Olardyń aıtýynsha, aıyptaýlar tek jábirlenýshilerdiń túsiniktemelerine negizdelgen jáne ózge aıǵaqtar jetkiliksiz. Jınalǵandar sottyń ádil sheshim shyǵarýyn talap etip jatyr.
Sot ǵımaratynyń aldynda polıtsııa qyzmetkerleri men jedel járdem kóligi kezekshilik etýde.
Buǵan deıin memlekettik aıyptaýshy Hasan Qasymbaevty 15 jylǵa bas bostandyǵynan aıyrýdy, al ózge sottalýshylarǵa 9 jyldan 22 jylǵa deıin jaza taǵaıyndaýdy suraǵan edi.
Іs boıynsha sot protsesi 20 tamyzda bastaldy. Alǵashqy otyrystardyń ózinde-aq qorǵaýshylar prokýror Nazgúl Táýekenbaıdy isten shettetý týraly ótinish berip, sýdıa Aınagúl Tuqýbaeva bul ótinishti qanaǵattandyrǵan edi.
Sot otyrysy ashyq rejımde ótip jatqanymen, buqaralyq aqparat quraldary úshin birqatar shekteý qoıylǵan: jýrnalıster sot otyrysyn kórshiles kabınetten beınetranslıatsııa arqyly baqylaıdy.
Hasan Qasymbaevpen birge aıyptalýshylar oryndyǵynda Rýslan Álıev, Madııar Qalımjanov, Saılaý Aqjanov, Nurmuhammet Sultanbekov, Danııar Asqarov otyr.
Olardyń bárine Qylmystyq kodekstiń úsh baby boıynsha aıyp taǵylǵan: adam urlaý, qasaqana aýyr jaraqat salý jáne qorqytyp aqsha alý.