Hasan Qasymbaev isi: fıtnes-jattyqtyrýshy ózin qalaı urlap ketip, uryp-soqqanyn aıtyp berdi

QONAEV. KAZINFORM — 22 tamyzda Talǵar aýdandyq sotynda 2021 jyly urlanyp, keıin soqqyǵa jyǵylǵan jábirlenýshi Arman Álimov jaýap berdi.

Sportshy Arman Álimov sot otyrysynda bergen jaýabynda Hasan Qasymbaevty 2016 jyldan beri tanıtynyn aıtty.

— 2020 jyly Eńbekshiqazaq aýdanynda atys boldy. Sol kezde Madııar Qalymjanov zardap shekti. Osy oqıǵadan keıin maǵan túrmeden Erjan Qasymbaev habarlasty. Ol — Hasannyń aǵasy. Ol menen osy atysqa qatysym bar-joǵyn, adamdarymdy jibergen-jibermegenimdi surady. Men «joq» dep jaýap berdim, tek tanystarym bolǵanyn aıttym, — dedi ol.

2021 jyly Arman Álimovtiń tanysyn soqqyǵa jyǵyp ketken. Ol aýrýhanada ony baryp kórgennen keıin izinen ańdý bastalǵan.

— Dosym, sportshy jigit ózin Qasymbaevtyń adamdary urǵanyn aıtty. Osydan keıin úıimniń janynda bir kóliktiń únemi torýyldap turǵanyn baıqadym. Bul shamamen eki aptadaı jalǵasty, biraq ol kezde meni ańdyp júrgenin bilmegen edim. Balalarǵa kerme jasap jatqanda Rýslan Álimovti kórip, sol kezde meni ańdyp júrgenin túsindim, — dedi jábirlenýshi.

Álimov ózine jasalǵan shabýyldyń qalaı bolǵanyn da aıtyp berdi.

— Dúkenniń janynda sottalýshylardyń beseýi jabyldy. Daıyn turǵan kólik boldy. Madııar amandasty da, dereý qolymnan ustap aldy. Bireýi aıaǵymnan ustap, aýdaryp túsirdi. Qolmen soqqy jasaǵanyn ǵana kórdim. Esimnen tanyp qaldym. Oıanǵanda kóliktiń artqy oryndyǵynda otyr ekenmin. Rýslan aıaǵymnan ustap turdy, Madııar denemdi, al Aqtanov basymdy ustap otyrdy. Olar meni Talǵardyń syrtyndaǵy dalaǵa alyp ketti. Kesh túsip qalǵan. Dalaǵa shyǵaryp alyp, suraq qoıyp, tergeı bastady. Sultanbekov pen Asqarov meni bıtamen urdy, — dedi ol.

Onyń aıtýynsha, kesh túsip, Saılaý tergep, qashan urý keregin aıtyp otyrǵan.

— Madııar Qalymjanov ústindegi fýtbolkasyn sheship, oq tıgen jaralaryn kórsetip, jylap, múgedek bolyp qalǵanyn aıtty. Olar atys jaıly bilgisi keldi, meni aıyptaı bastady. Aqtanovtyń Qasymbaevqa qońyraý shalyp, «Ári qaraı ne isteımiz?» dep suraǵanyn anyq estidim. Rýslan meni vıdeoǵa túsirip turdy, basqalary azaptady. Keıin Qasymbaev «Meni kútińder» dedi. Qarańǵy túskende ol keldi, biraq kólikten túspedi, terezesin ashyp, men oey kórdim. Ol: «Jetedi, kettik, áshkere boldyq, qyzmetkerler kele jatyr» dedi. Olar tez kólikterine otyryp ketti. Telefonym boldy, tanys taksı júrgizýshisine habarlastym, ol kelip alyp ketti, — dedi Álimov.

Eske salaıyq, Hasan Qasymbaev byltyr qarasha qamaýǵa alyndy. 

Bas prokýratýra Talǵarda adam urlap, uryp-soǵýǵa qatysty isti qaıta qarady.

Hasan Qasymbaevqa adam urlaý, densaýlyqqa qasaqana aýyr zııan keltirý jáne bopsalaý faktileri boıynsha aıyp taǵylyp otyr.

Sot bastalǵannan keıin aıyptalýshylardyń advokattary prokýrordy aýystyrýdy ótindi.

Sýdıa Aınagúl Tuqybaeva bul ótinishti qanaǵattandyryp, memlekettik aıyptaýshy zaldan shyqty.

Hasan Qasymbaevpen birge kimderge aıyp taǵylǵany belgili boldy.

Búgin, 22 tamyzda prokýror aıyptaý aktisin oqyp berdi.

Hasan Qasymbaevtyń ózi taǵylǵan aıyptardy moıyndamady.