Hasan Qasymbaev isi boıynsha sottalýshylar sońǵy sózin aıtty

QONAEV. KAZINFORM — Talǵarda Hasan Qasymbaev pen taǵy bes sottalýshyǵa qatysty atyshýly is boıynsha sot protsesi jalǵasyp jatyr. 

Kezekti otyrysta sottalýshylar sońǵy sózin aıtty.

Áýeli Rýslan Álıev sóıledi. Ol «Buzaqylyq» baby boıynsha óz kinásin moıyndaıtynyn jáne sottan ádil sheshim shyǵarýdy surady.

Madııar Qalımjanov ta «Buzaqylyq» baby boıynsha taǵylǵan aıyppen kelisip, basqa epızodtardy joqqa shyǵardy. Ol jábirlenýshiniń anasynan keshirim surap, sotty ádildikke úndedi. Qalımjanovtyń sózinshe, «kinásiz adamdar zardap shekpeýi kerek».

Hasan Qasymbaev ta sońǵy sózin aıtty. Ol sózin «ózimdi aqtaý úshin emes, ádildik úshin aıtyp turmyn» dep bastady. Onyń aıtýyna qaraǵanda, qylmystyq is qoldan jasalǵan jáne tek jábirlenýshilerdiń aıǵaqtaryna negizdelgen.

— Bul is Sherzat Polatty óliminen paıda boldy. Qoǵamdy tynyshtandyrý úshin bir «kináli» kerek boldy, sol adam etip meni tańdady. Alaıda shyndyq jeńýi kerek. Dálelsiz adamdy aıyptaý — tek maǵan emes, meniń otbasyma da jasalǵan ádiletsizdik, — dedi ol.

Qasymbaev tergeý barysyndaǵy zań buzýǵa joǵary organdardyń nege kóz jumyp otyrǵanyna tańdanys bildirdi.

— Memlekettik aıyptaýshy meniń quqyǵymnyń buzylǵanyn, istiń shıki ekenin bile tura, 15 jyl bas bostandyǵymnan aıyrýdy surady. Bul — ádiletsiz ári zańǵa qaıshy. Biz quqyqtyq memlekette ómir súrip jatyrmyz, mundaı bassyzdyq bolmaýy kerek, — dedi sottalýshy.

Ol buǵan deıin eshqashan qylmystyq jaýapkershilikke tartylmaǵanyn, kámeletke tolmaǵan balalary baryn jáne ómir boıy zańǵa baǵynǵan azamat bolǵanyn atap ótti.

Sonymen qatar Hasan Qasymbaev óz sózinde jábirlenýshi fıtnes-jattyqtyrýshy Arman Álimovti jalǵan aqparat taratty dep aıyptap, onyń ózin qylmystyq jaýapkershilikke tartý qajet ekenin aıtty. Onyń pikirinshe, Álimov zańsyz istermen aınalysqan, buǵan qosa, qoǵamdy adastyryp otyr.

Qasymbaev ekinshi jábirlenýshi, kásipker Áripjan Tájıevtiń ózine taǵylǵan aıyptaýdan bas tartqanyn aıtty. Onyń oıynsha, bul jaǵdaı óziniń kinásiz ekenin kórsetedi.

— Nelikten bul adamdar jaýapqa tartylmaıdy? Maǵan Sherzat Polat isinen keıin «qoǵamdy tynyshtandyrý úshin» jalǵan aıyp taǵyp, kináli etti. Ádildik qaıda? Jábirlenýshilerdiń sózderi dálelmen rastalýǵa tıis edi, biraq olaı bolmady. Men tergeý ızolıatorynda bir jyldan astam ýaqyttan beri otyrmyn. Osy ýaqyt ishinde otbasym qatty qınaldy. Balalarym meni kútip otyr, olarǵa meniń qoldaýym kerek. Bir jalǵan kýálik úshin adamnyń taǵdyryn talqandaýǵa bola ma? — dedi ol.

Sondaı-aq, Qasymbaev Arman Álimovtiń ózin «Hýtor» dep atalatyn qylmystyq toptyń basshysy dep jalǵan aıyptaǵanyn aıtty. Onyń sózine qaraǵanda, ІІM mundaı toptyń joq ekenin resmı túrde málimdegen.

— Sottan meniń jáne otbasymnyń ómirin talqan etpeýdi suraımyn. Qudaı men zań aldynda aqpyn. Sot ádil sheshim shyǵarady dep senemin, sońǵy úmitim — sizde. Meni aqtaýyńyzdy suraımyn, — dedi Hasan Qasymbaev.

Saılaý Aqtanov, Nurmuhammet Sultanbekov jáne Danııar Asqarov BAQ aldynda sóıleýden bas tartty. Jýrnalısterdi zaldan shyǵaryp, basqa bólmege kirgizgennen keıin sottalýshylar óz kinásin moıyndamaıtynyn jáne taǵylǵan aıyptardyń negizsiz ekenin málimdedi.

Aıyptalýshylardyń biri jábirlenýshi Arman Álimovti jalǵan kýálik berdi dep aıyptap, onyń ózi de esirtki taratýǵa qatysy bar bolýy múmkin ekenin aıtty.

Olar sóz sońynda sottyń ádil sheshim shyǵaratynyna úmit artatynyn aıtty.

Sot alqasy barlyq aıyptalýshy sóılep bolǵan soń keńesý bólmesine ketti. Hasan Qasymbaev pen ózge de sottalýshylarǵa qatysty úkim 11 qarasha kúni saǵat 10:00–de jarııalanatyn boldy.

Buǵan deıin memlekettik aıyptaýshy Hasan Qasymbaevty 15 jylǵa bas bostandyǵynan aıyrýdy, al ózge sottalýshylarǵa 9 jyldan 22 jylǵa deıin jaza taǵaıyndaýdy suraǵan edi.

Іs boıynsha sot protsesi 20 tamyzda bastaldy. Alǵashqy otyrystardyń ózinde-aq qorǵaýshylar prokýror Nazgúl Táýekenbaıdy isten shettetý týraly ótinish berip, sýdıa Aınagúl Tuqýbaeva bul ótinishti qanaǵattandyrǵan edi.

Sot otyrysy ashyq rejımde ótip jatqanymen, buqaralyq aqparat quraldary úshin birqatar shekteý qoıylǵan: jýrnalıster sot otyrysyn kórshiles kabınetten beınetranslıatsııa arqyly baqylaıdy.

Hasan Qasymbaevpen birge aıyptalýshylar oryndyǵynda Rýslan Álıev, Madııar Qalımjanov, Saılaý Aqjanov, Nurmuhammet Sultanbekov, Danııar Asqarov otyr.

Olardyń bárine Qylmystyq kodekstiń úsh baby boıynsha aıyp taǵylǵan: adam urlaý, qasaqana aýyr jaraqat salý jáne qorqytyp aqsha alý.