Hasan Qasymbaev qatysty sot otyrysy qashan ótetini belgili boldy
QONAEV. KAZINFORM - Birneshe bap boıynsha aıyp taǵylǵan Hasan Qasymbaevtyń isi Talǵar aýdandyq sotynda qaralady.
Almaty oblystyq sotynyń baspasóz qyzmeti alǵashqy sot otyrysy 20 tamyzǵa taǵaıyndalǵanyn málimdedi.
Eske salaıyq, Almaty oblysy polıtsııa departamentiniń tergeý basqarmasy osy jyldyń 21 shildesinde isti aıyptaý aktisimen oblys prokýratýrasyna joldaǵan. Al oblys prokýratýrasy 29 shildede is boıynsha qurylǵan aıyptaý aktisin bekitip, isti negizinen qaraý úshin Talǵar aýdandyq sotyna joldady.
Almaty oblystyq polıtsııa departamentiniń málimetine sáıkes, Hasan Qasymbaevqa qatysty adam urlaý, densaýlyqqa qasaqana aýyr zııan keltirý jáne bopsalaý faktileri boıynsha tergeý amaldary júrgizildi.
Byltyr qarasha aıynda Hasan Qasymbaev qamaýǵa alyndy.
Buǵan deıin 16 jastaǵy Sherzat Polattyń óliminen keıin talǵarlyqtar ony «Hýtorskıe» tobynyń basshysy bolýy múmkin ekenin aıtqan edi. Keıin Іshki ister mınıstriniń birinshi orynbasary Baýyrjan Álenov kásipker Hasan Qasymbaevqa qatysty túsinik berdi.
Bas prokýratýra Talǵarda adam urlap, uryp-soǵýǵa qatysty isti qaıta qarady.