«HAS» qarjy pıramıdasynyń negizin qalaýshylar alaıaqtyq úshin sottaldy

PAVLODAR. KAZINFORM — Pavlodarda «HAS» dep atalatyn qarjy pıramıdasyn qurý isi boıynsha rezonansty sot úkimi shyǵaryldy. Bul týraly Pavlodar oblysynyń prokýratýrasy habarlady.

— Sot 2022-2023 jyldar aralyǵynda qarjy pıramıdasynyń basty uıymdastyrýshysynyń qylmystyq topty quryp, ony basqarǵany anyqtady. Ol azamattardyń aqshalaı qarajatyn joǵary tabysty ınvestıtsııa retinde tartý arqyly alaıaqtyqpen aınalysqan. Ýáde etilgen 70%-ǵa deıingi paıda kópshilikke tartymdy kórinip, kóptegen azamattar senip qalǵan, — delingen habarldamada.

Saldarynan Astana, Almaty, Pavlodar, Ekibastuz jáne basqa da eldi mekenderde 376 azamat alaıaqtarǵa 2 mıllıard teńgeden astam qarajat tapsyrǵan.

Memlekettik aıyptaýshy tarap — prokýratýra qylmystyq shemany uıymdastyrýshyǵa qatań jaza taǵaıyndaýdy talap etti. Sot aıyptaý tarapynyń ustanymyn qoldap, qarjy pıramıdasynyń negizin qalaýshyny 12 jylǵa bas bostandyǵynan aıyrdy. Qylmystyq toptyń qalǵan músheleri de túrli merzimder men jaza túrlerine kesildi.

Aıta ketý kerek, prokýratýra istiń ádil úkimmen aıaqtalýynda mańyzdy ról atqardy. Ol sotqa uıymdasqan alaıaqtyqtyń jan-jaqty dálelderin usyndy.

Qazirgi tańda úkim zańdy kúshine engen joq.

Aıta ketelik «Asar Baspana» qarjy pıramıdasy 86 myńnan astam azamattan 12,4 mlrd teńge tartqan edi.