Harýkı Mýrakamı úsh jyldan keıin taǵy bir romanyn jaryqqa shyǵardy
ASTANA. KAZINFORM – Álemge áıgili japon jazýshysy Harýkı Mýrakamı juma kúni «Kahonyń oqıǵasy» atty romanyn tanystyrdy. Bul – onyń sońǵy úsh jyldaǵy alǵashqy kólemdi romany, dep habarlaıdy Kyodo.
Shinchosha baspasynyń málimetinshe, kitaptyń alǵashqy taralymy 250 myń danany quraıdy. Sonymen qatar onyń elektrondy nusqasy da qatar jaryq kóredi.
Romannyń basty keıipkeri – Kaho esimdi 26 jastaǵy balalarǵa arnalǵan sýretti kitaptardyń avtory. Baspanyń málimetinshe, Mýrakamı óz romanynyń jalǵyz basty keıipkeri retinde áıeldi alǵash ret tańdaǵan.
Kitap jazýshynyń 2024 jylǵy maýsymnan bıylǵy naýryzǵa deıin Shincho ádebı jýrnalynda jarııalanǵan tórt bólimnen turatyn serııasyn biriktirip, jańasha paıymdaıdy.
Kyodo News agenttigine bergen suhbatynda Mýrakamı romanmen jumys isteý ózi úshin «naǵyz lázzat» bolǵanyn aıtty. Ol bul úderisti qysqa áńgimelerdi qurastyrýmen salystyrdy. Jazýshynyń aıtýynsha, aldyńǵy bólimdi aıaqtaǵannan keıin biraz ýaqyt ótken soń kelesisin jazýǵa daıyn ekenin sezingen. Keıin olardyń barlyǵyn bir-birimen baılanystyryp, sońynda birneshe tolyqtyrý engizgen. Onyń sózinshe, jumys barysynda aıtarlyqtaı qaıshylyqtar týyndamaǵan ári sıýjet kútpegen baǵytqa aýytqymaǵan.
Harýkı Mýrakamı 1949 jyly Kıoto qalasynda dúnıege kelgen. Ol Japonııada jáne shetelde kóptegen ádebı syılyqtarǵa, sonyń ishinde Frants Kafka atyndaǵy syılyqqa ıe bolǵan. Sonymen qatar jazýshy, eń aldymen, amerıkalyq ádebıetti aýdarǵan kórnekti aýdarmashy retinde de tanymal.
Onyń eń tanymal shyǵarmalarynyń qatarynda «Norveg ormany», «Qusserippeniń shejiresi» jáne «1Q84» romandary bar. «Kahonyń oqıǵasy» – Mýrakamınyń 2023 jyly jaryq kórgen «Qala jáne onyń senimsiz qabyrǵalary» kitabynan keıingi alǵashqy kólemdi romany.
Eske sala keteıik, Harýkı Mýrakamıdiń jańa kitabynyń shyqqany týraly jazyp edik.
