Harrıstiń tanymaldylyǵy Tramptan joǵary – sońǵy saýalnama qorytyndysy
ASTANA. KAZINFORM – Demokratııalyq partııanyń Ulttyq sezd aldynda jáne onyń barysynda júrgizilgen birqatar saýalnama Demokratııalyq partııadan prezıdenttikke úmitker Kamala Harrısti qoldaý deńgeıi Respýblıkalyq partııanyń qarsylasy Donald Tramptan joǵary ekenin kórsetti.
«Gallup» saýalnamasy boıynsha, demokrattar men táýelsiz saılaýshylardyń vıtse-prezıdent Kamala Harrıske degen yqylasy zor, jáne burynǵy prezıdent Donald Tramp reıtınginen asyp tústi.
Kamala Harrıstiń tanymaldylyǵy tamyzda 13 paıyzdyq tarmaqqa, 47 paıyzǵa deıin ósti. Al burynǵy prezıdent Donald Tramptyń reıtıngi 5 paıyzdyq tarmaqqa, 41 paıyzǵa deıin tómendep, qarashada ótetin prezıdenttik saılaýdy tartysty etti.
Kamala Harrıstiń qolaıly reıtıngi demokrattar arasynda 93%, táýelsizder 41% jáne respýblıkashylar 5%-ǵa deıin kóterildi.
Vıtse-prezıdenttiń jumysyn maquldaý reıtıngi qazir 47% quraıdy, bul jeltoqsandaǵy aldyńǵy kórsetkishten 7 tarmaqqa joǵary. K.Harrıstiń vıtse-prezıdenttik merzimi kezinde ol 40%-dan 49%-ǵa deıin aýytqyp turdy.
Sondaı-aq «Gallup» málimetinshe, prezıdent Djo Baıdenniń reıtıngi tamyz aıynda prezıdenttik jarystan shyǵyp qalǵannan keıin birneshe apta ishinde 7 tarmaqqa, 43%-ǵa deıin kóterildi, bul demokrattardyń sheshimdi 89% maquldaýyna baılanysty bolýy múmkin.
Saýalnama 1-20 tamyz aralyǵynda Demokratııalyq partııanyń 19-22 tamyzda ótken Ulttyq sezi kezinde júrgizildi. Qorytyndy AQSh-tyń barlyq 50 shtatynda jáne Kolýmbııa okrýginde turatyn 1015 AQSh eresekteriniń kezdeısoq tańdaýyna negizdelgen. Tańdaý qateliginiń shegi 95% senimdilik deńgeıinde +/- 4 paıyzdyq tarmaq bolady.
