Harrıstiń basshylyǵymen AQSh Kongresi Tramptyń saılaýdaǵy jeńisin rastaıdy

VAShINGTON. KAZINFORM – AQSh Kongresiniń Senaty men Ókilder palatasy 6 qańtarda birlesken otyrysqa jınalady, onyń barysynda 2024 jyldyń 5 qarashasynda ótken prezıdent saılaýynyń nátıjeleri bekitiledi, dep habarlaıdy TASS. 

Qazirgi prezıdent Djo Baıden men AQSh-tyń saılanǵan prezıdenti Donald Tramp Senat pen Ókilder palatasynyń otyrysyna qatyspaıdy.

Amerıkalyq BAQ-tyń paıymdaýynsha, saılaý nátıjelerin bekitý rásimi bul joly tórt jyl burynǵydaı Vashıngtonda narazylyqtar men tártipsizdikterge ulaspaıdy. 2021 jyldyń 6 qańtarynda Vashıngtonda myńdaǵan adam jınalyp, sol kezdegi prezıdent Tramptyń jaqtastary saılaý nátıjelerin maquldaýǵa kedergi keltirýge tyrysqan bolatyn. Olar tipti Kongresske basyp kirgen.

Harrıs óziniń jeńilgenin rastaıdy

Otyrysty Konstıtýtsııa boıynsha Senat basshysy sanalatyn AQSh vıtse-prezıdenti Kamala Harrıs júrgizedi. Baıden men Tramp qatyspaıdy. Baıden saılaý dodasynan bas tartqannan keıin Tramptyń saılaýdaǵy qarsylasyna aınalǵan vıtse-prezıdent óziniń jeńilgenin resmı túrde rastaýǵa májbúr. Degenmen saılaý naýqany kezinde Trampty demokratııaǵa qaýip tóndiredi dep qaıta-qaıta dabyl qaqqan Harrıs saılaýdan keıingi kúni-aq jeńilgenin moıyndap, ony jeńisimen quttyqtaǵan bolatyn.

Donald Tramptyń ınaýgýratsııasy 20 qańtarda ótedi.

Aıta keteıik, Trampqa para alý isi boıynsha úkim 10 qańtarda shyǵady.

Tramp Florıdadaǵy rezıdentsııasynda Melonıdi qabyldady.

Myńdaǵan bosqyn Meksıkadan AQSh shekarasyna qaraı baǵyt aldy. Olar Tramp saılanǵanǵa deıin AQSh-qa kirýge nıetti.