Harrıs saılaý aldynda Tramptan 4%-dyq tarmaqqa alda keledi: saýalnama qorytyndylary

ASTANA. KAZINFORM — Turǵyndar arasynda júrgizilgen saýalnamanyń sońǵy málimetinshe, AQSh vıtse-prezıdenti demokrat Kamala Harrıs saılaý qarsańynda áleýetti saılaýshylar arasynda tanymaldyǵy boıynsha burynǵy respýblıkashyl prezıdent Donald Tramptan tórt paıyzdyq tarmaqqa ozyp ketti, dep habarlaıdy The Hill. 

NPR, PBS News jáne Marist sollege júrgizgen saýalnamaǵa sáıkes, Harrısti respondentterdiń 51%-y, al Trampty — 47%-y qoldady. Taǵy 2 paıyzy basqa kandıdattarǵa daýys berdi. Bul rette qazan aıynyń basynda júrgizilgen uqsas saýalnama Harrısti respondetterdiń 50%-y, al Trampty 48%-y qoldaǵanyn kórsetti.

Saýalnama qorytyndysy kórsetkendeı, Harrıs aq násildi emes amerıkandyqtar men 1946-1964, 1981-1996 jáne 1997-2012 jyldary týǵan adamdar arasynda, al Tramp aq násildi saılaýshylar, 1928-1945 jáne 1965-1980 jyldary týǵandar arasynda unamdy kórinedi.

Olaı bolǵanymen, respondentterdiń 49%-y saılaýda Tramp jeńetinine senimdi bolsa, 46%-y Harrıstiń jeńiske jetýin kútip otyr.

Bul rette saýalnamaǵa qatysqandardyń jartysy Tramp ekonomıkalyq máselelerdi jaqsyraq sheshedi dep oılaıdy, al Harrıske 49%-y daýys bergen. Sondaı-aq, suralǵandardyń 55%-y Tramptyń saılaý aldyndaǵy ýádelerin oryndaıtynyna senimdi, 44%-y bul málimdemeler daýys jınaý úshin jasalyp otyr degen pikir aıtty. Harrıske qatysty bul másele boıynsha pikir 49%-dy qurady.

Sonymen qatar, suralǵandardyń 71%-y olardyń kandıdaty daýys berý nátıjelerin qandaı bolsa da qabyldaýy kerek dep sense, 27%-y úmitkerdiń olarǵa qarsy shyǵa alady dep sanaıdy. Respondentterdiń 72%-y saılaýdan keıingi zorlyq-zombylyq áreketterinen qorqady.

Saýalnama 31 qazan men 2 qarasha aralyǵynda júrgizildi. Oǵan 1297 adam qatysty.

Eske sala ketsek, AQSh-tyń 70 053 286 turǵyny merziminen buryn daýys berý quqyǵyn paıdalanǵan. 

Memlekettegi eń joǵary laýazymǵa úmitkerler qubylmaly shtattarda saılaýshylarmen sońǵy kezdesýlerin ótkizdi.