Harbın bıyl meımandaryn úsh alyp muz qalashyǵymen qarsy alady

BEIJІŃ. KAZINFORM — Bıylǵy qysta Harbın qonaqtaryn árqaısysynyń aýmaǵy 1 mln sharshy metrden asatyn úsh alyp muzdan jasalǵan týrıstik aımaqta qarsy alady, dep jazdy Sınhýa.

Bıylǵy qysta Harbın qalasy qonaqtar men qysqy týrızm jankúıerlerine jańa tosynsyı ázirlep otyr — olardy árqaısysynyń aýdany 1 mıllıon sharshy metrden asatyn úsh iri muz qalashyǵy kútip tur. Bul týraly Heılýntszıan provıntsııasy halyq úkimetiniń baspasóz qyzmeti seısenbi kúni ótken brıfıngte habarlady.

Harbın qalasynyń mádenıet, radıo, teledıdar jáne týrızm basqarmasynyń basshysy Van Hýnsın chinanews.com.cn portalyna bergen jaýabynda negizgi nazar «Muz ben qardyń úlken álemi» saıabaǵyna aýdarylyp otyrǵanyn aıtty. Bul — muz ben qar taqyrybyna arnalǵan álemdegi eń iri saıabaqtardyń biri.

Bıyl onyń aýmaǵy 1 mln-nan 1,2 mln sharshy metrge deıin ulǵaıyp, munda zamanaýı tehnologııalar elementteri, balalarǵa arnalǵan shyǵarmashylyq jobalar, erekshe sáýlettik stıldegi nysandar, iri dekoratıvti ınstallıatsııalar men oıyn-saýyq attraktsıondary shoǵyrlanatyn bolady.

Ekinshi basty kórikti oryn — Taııandao (Kún araly) aralyndaǵy Halyqaralyq qar músinderi kórmesi. Onyń tarıhy 1988 jyldan bastaý alady. Bıylǵy maýsymda kórme aýmaǵy 1,5 mln sharshy metrge deıin keńeıtilip, paıdalanylǵan qar kólemi 120 myń tekshe metrge jetpek.
Munda kelýshiler 260-tan astam keremet qar músinderin tamashalap qana qoımaı, qar ústinde oınap júrgen alyp pandalardy, erkin júrgen pıngvınder men «orman patshasy» jolbarystardy kóre alady. Uıymdastyrýshylardyń aıtýynsha, munyń barlyǵy adam men tabıǵattyń úılesimin beıneleýge baǵyttalǵan.

Qysqy belsendi demalysty súıetinder úshin úshinshi aımaq — Sýnhýatszıan (Sýngarı) ózenindegi «Muz jáne qar karnavaly». Onyń aýmaǵy 1,45 mln sharshy metrge deıin keńeıtilgen. Muz qatqan ózen betinde 60-tan astam oıyn-saýyq jobasy uıymdastyrylady: qar ústimen drıftıng, snoýkart pen snegohodta júrý, áýe jastyǵy bar qaıyqpen syrǵanaý jáne taǵy basqalar. Ózenniń eki jaǵalaýynda bıik qardan jasalǵan alyp qar adamy músinderi ornatylady.

Sonymen qatar, bıylǵy qysta qala aýmaǵynda 20-dan astam shańǵy bazasy ashylyp, týrısterge qyzmet kórsetý ınfraqurylymy jańǵyrtylady.

Aıta keteıik, Harbınniń qysqy maýsymy dástúrli túrde reseılik týrıster arasynda erekshe tanymal.

Statıstıkalyq málimetterge súıensek, 2024–2025 jylǵy qysqy maýsymda Harbın 135 mıllıon týrıst qabyldaǵan, olardyń shamamen 6,3 paıyzy sheteldik, al solardyń basym bóligi — Reseı azamattary.

Sarapshylardyń pikirinshe, Qytaıdyń qyrkúıek aıynan bastap Reseı azamattaryna engizgen vızasyz rejımi arqasynda bıyl Harbınge keletin reseılik týrıster sany budan da arta túspek.

Eske sala keteıik, jyl basynda IX qysqy Azııa oıyndary Harbınde ótti.