Harbın-2025: Qysqy Azııa oıynynda el namysyn qansha sportshy qorǵaıdy
ASTANA. KAZINFORM — 2025 jylǵy 7-14 aqpan aralyǵynda Qytaıdyń Harbın qalasynda ótetin IX qysqy Azııa oıyndaryna Qazaqstannan 139 sportshy el namysyn qorǵaıdy. Olar 64 medal jıyntyǵy sarapqa salynatyn 11 sport túrinen synǵa túsedi.
Bul týraly QR Týrızm jáne sport mınıstrligi Qoǵamdyq keńesiniń kezekti otyrysynda Sport jáne dene shynyqtyrý isteri komıtetiniń tóraǵasy Rýslan Esenalın atap ótti.
— Harbınde Qazaqstan quramasynyń sportshylary 64 medal jıyntyǵy sarapqa salynatyn 11 sport túrinen synǵa túsedi. Sary qurlyq dodasynda otandyq 139 sportshy óner kórsetedi. Bıylǵy Azıada baǵdarlamasyna shańǵy-alpınızm sporty engizilgen. Qazaqstandyq sportshylar bul sport túrinen jaqsy nátıje kórsetýdi josparlap otyr, - dedi Sport jáne dene shynyqtyrý isteri komıtetiniń tóraǵasy Rýslan Esenalın.
Aıta keteıik, 2017 jyly Sapporoda (Japonııa) ótken eń sońǵy qysqy Azııa oıyndarynda Qazaqstan quramasynyń sportshylary jalpy sany 32 medal jeńip alǵan bolatyn.