Harbın-2025: Qazaqstan quramasynyń sportshylary jarys ótetin oryndardyń ınfraqurylymymen tanysty
ASTANA. KAZINFORM - Qazaqstan Ulttyq Olımpıadalyq komıtetiniń ókilderi Qytaıdyń Harbın qalasyna baryp, 2025 jylǵy Azııa oıyndarynyń qarsańynda alǵashqy daıyndyq jumystaryn júrgizdi, dep habarlaıdy komıtet ókilderi.
Delegatsııa Qazaqstan quramasynyń sportshylaryn sátti tirkep, jarys ótetin oryndardyń ınfraqurylymymen jan-jaqty tanysty.
Olımpıada oıyndarynan aıyrmashylyǵy, Harbındegi Azııa oıyndarynda biryńǵaı Atletter aýmaǵy qarastyrylmaǵan.
Qazaqstan UOK Sport departamentiniń basshysy Bektur Qııatbaıdyń aıtýynsha, sportshylar eki jerde ornalasady: Harbınniń ózinde jáne shańǵy jarystary ótetin ıAbýlı taý shańǵysy kýrortynda.
- Búgin biz sporttyq ınfraqurylymmen tanysyp, barlyq qajetti aqparatty aldyq. Bul málimetterdi tolyqtaı komandalarǵa jetkizýge daıynbyz. Jalpy, Harbın Azııa oıyndaryn ótkizýge tolyq daıyn, joǵary deńgeıdegi uıymdastyrý jumystary áýejaıdan bastap-aq seziledi. Barlyq mańyzdy jaıttar eskerilgen. Bıatlon komandasyna qarý-jaraqty alyp ótýge ruqsat alý protsesi de sátti ótti. Infraqurylym boıynsha barlyq nysandar qajetti talaptarǵa saı. Sonymen qatar ashylý rásimi ótetin alań sportshylar ornalasatyn qonaq úıge jaqyn. Bul óte yńǵaıly, óıtkeni alysqa barýdyń qajeti joq. Bul – Harbındegi Azııa oıyndarynyń erekshelikteriniń biri.
Tamaqtaný máselesine qatysty da eshqandaı suraq nemese eskertý joq. Barlyq qajetti talaptar eskerilgen, árbir sportshy ózine qajetti mázirdi tańdaı alady, – dedi Qazaqstan UOK Sport departamentiniń basshysy.
Aıta keteıik, 2025 jylǵy Azııa oıyndary 7–14 aqpan aralyǵynda Harbınde ótedi. Qazaqstan quramasy 3 aqpannan bastap medal úshin saıysqa túsedi.
Eske salsaq, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady.
QR Týrızm jáne sport mınıstrliginiń habarlaýynsha, Qazaqstannan 139 sportshy el namysyn qorǵaıdy.