Harbın-2025: Azııa oıyndarynda Qazaqstan quramasy qandaı forma kıedi
ASTANA. KAZINFORM – Qazaqstan Respýblıkasy Týrızm jáne sport mınıstrligi 2025 jyldyń 7-14 aqpan aralyǵynda Qytaıdyń Harbın qalasynda ótetin IX Qysqy Azııa oıyndarynda ulttyq qurama kıetin sporttyq formasyn tanystyrdy.
Qazaqstan Respýblıkasy Týrızm jáne sport mınıstrligi ulttyq quramanyń
Jańa forma halyqaralyq standarttarǵa saı ázirlenip, ulttyq talaptar tolyq eskerilgenin atap ótti.
Negizgi túster – qoıý kók pen ashyq kók. Bul túster turaqtylyqty, táýelsizdikti jáne jańa belesterge umtylysty beıneleıdi. Aq tústi elementter tazalyqty jáne sporttaǵy ádildik qaǵıdattaryn aıqyndaıdy.
Dızaın memlekettik rámizdermen: eltańba jáne týmen tolyqtyrylǵan.
Sonymen qatar formanyń bezendirilýinde QAZAQSTAN jazýy, 2025 jylǵy IX Qysqy Azııa oıyndarynyń logotıpi jáne Qazaqstan Ulttyq Olımpıada komıtetiniń emblemasy bar.
Forma zamanaýı tehnologııalarmen jasalǵan joǵary sapaly materıaldardan daıyndalǵan.
Sportshylardyń jaılylyǵy úshin tabıǵı termoretteý qasıetine ıe matalar qoldanyldy. Syrtqy kıim tabıǵı mamyqpen jylytyp, jeńil ári jylýdy saqtaıtyn etip jasalǵan. Sporttyq kostıýmderde sýyq jaǵdaılarda da jylý saqtaıtyn joǵary tehnologııalyq flıs paıdalanyldy.
Forma jıyntyǵyna jyly kýrtka, jelden qorǵaıtyn kostıým, jılet, sporttyq jáne jattyǵý kıimderi, fýtbolka, shorty, bas kıimder, sporttyq aıaq kıim jáne ártúrli aksessýarlar kiredi.
IX Qysqy Azııa oıyndaryna Azııanyń 32 elinen 1147 sportshy qatysady. Jarys baǵdarlamasy aıasynda 6 sport túri jáne 11 dıstsıplına boıynsha 196 medal jıyntyǵy sarapqa salynady.
Jańa sporttyq formanyń jasalýy demeýshiler qoldaýynyń arqasynda júzege asty.
Aıta keteıik, osyǵan deıin Qysqy Azııa oıyndaryna Qazaqstannan 139 sportshy qatysatyny týraly jazǵan bolatynbyz.