Harkovta bir top adamdy taptap ótken boıjetken kólik jarysyna qatysqan

ASTANA. QazAqparat - Keshe Ýkraınanyń Harkov qalasynyń ortalyǵynda jol talǵamaıtyn «Lexus» kóligi adamdardy taptap ketken edi. Ýkraına ishki ister mınıstriniń keńesshisi Anton Geraşenko óziniń Feısbýktegi paraqshasynda  osy oqıǵaǵa qatysty jańa derekterdi jarııalady, dep habarlaıdy «QazAqparat» HAA tilshisi.

«Keshe Harkovta bolǵan qaıǵyly jaǵdaıdyń mán-jaıy anyqtaldy. Bul vıdeony kórgen adamdarda da, mende de mynadaı suraq týyndady: Nege «Leksýs» kóliginiń tizginindegi boıjetken soqtyǵysqan sátte toqtaýǵa umtylmady? Vıdeobaqylaý kameralaryndaǵy taspany kórgennen keıin bári belgili boldy. Jol talǵamaıtyn «Leksýs» mashınasy keshki Harkovtyń kólik jarysyna qatysqan», - dep jazdy ІІM keńesshisi.

Aıta keteıik , jol-kólik oqıǵasy 18 qazan kúni saǵat 20-45-te Ýkraınanyń Harkov qalasynda  bolǵan. Oqıǵanyń saldarynan 11 adam zardap shegip, altaýy qaıtys bolǵan. Jol talǵamaıtyn kólik ózge kólikpen soqtyǵysqannan soń, jol jıegine shyǵyp ketken jáne ol baǵdarshamnyń qyzyl túsine jyldamdyqty shekten tys asyra ketip bara jatqan. Kólikti basqaryp otyrǵan júrgizýshi boıjetken ustaldy.