Hantavırýs anyqtalǵan krýızdik kemeden evakýatsııalanǵan sońǵy top Nıderlandqa ushady — Ispanııa DSM
ASTANA. KAZINFORM — MV Hondius krýızdik kemesinde hantavırýs indeti anyqtalǵannan keıin evakýatsııalanǵan jolaýshylardyń sońǵy toby dúısenbi kúni keshirek Nıderlandqa ushyp ketedi. Bul týraly Ispanııanyń densaýlyq saqtaý mınıstri Monıka Garsııa málimdedi, dep Sınhýa agenttigi jazdy.
Mınıstrdiń aıtýynsha, qazirgi ýaqytta kemede 54 adam qalyp otyr, olardyń 22-si jaǵaǵa túsip, Nıderlandqa ushady. Qalǵan 32 adam — ekıpaj músheleri — Nıderlandqa krýızdik kemeniń ózimen jol tartady.
Tenerıfe aralyndaǵy Granadılıa portynda ótken baspasóz máslıhatynda mınıstr Ispanııa bıligi bastapqyda Avstralııa men Nıderlandqa eki evakýatsııalyq reıs uıymdastyrýdy josparlaǵanyn aıtty.
Alaıda bastapqyda Avstralııaǵa jiberilýi tıis bolǵan jolaýshylar Nıderlandqa jetkiziletin boldy. Monıka Garsııa jospardyń ne sebepti ózgergeni belgisiz ekenin atap ótti.
Mınıstrdiń sózinshe, jeksenbi kúni kemeden 19 eldiń 94 jolaýshysy evakýatsııalanǵan.
Sondaı-aq ol MV Hondius kemesi porttan ketkennen keıin Ispanııa bıligi port aýmaǵynda dezınfektsııa jumystaryn júrgizetinin habarlady.
Buǵan deıin DDU MV Hondius laınerinen evakýatsııalanǵan jolaýshylarǵa 42 kúndik karantındi usynǵan bolatyn.
Al krýızdik laınerdegi 150 jolaýshynyń arasyndaǵy 17 amerıkalyq Ispanııanyń Tenerıfe aralyna evakýatsııalanǵan bolatyn. Ólimge ákelýi múmkin hantavırýs indetinen keıin AQSh-tyń jeti shtaty amerıkalyq jolaýshylardy qabyldaýǵa jáne baqylaýǵa daıyndalyp jatyr.
