Hanshaıym Dıananyń kabrıoleti bássaýdada satyldy
ASTANA. QazAqparat - Koroldik januıa músheleri men tanymal tulǵalar menshiginde bolǵan avtokólikter aýktsıon arqyly satyldy, olardyń jalpy quny 450 myń fýntty (565 myń dollar) qurady, dep habarlaıdy Bı-bı-sı.
Senbi jáne jeksenbi kúnderi NEC Classic Motor Show avtoshoýynda «Taq marjandary» atty kólikter kollektsııasy satylymǵa shyǵaryldy.
Bir kezderi hanshaıym Dıana mingen 1994 jylǵy Audi kabrıoleti 54 myń fýntke (68 myń dollar) satyldy. Ol bar-joǵy 6,5 myń shaqyrym ǵana júrgen.
Satylymǵa qoıylǵan toptama arasynda Elton Djonǵa tıesili Rolls-Royce Phantom da bar. Ol 124 myń fýnt (155 myń dollar) bolyp baǵalandy, sońǵy ret bul kólikti E.Djon 2005 jyly úılený toıynda mingen.
Dál osy markadaǵy Katar koroldik úıiniń Rolls-Royce Corniche kabrıoleti 135 myń fýnt (170 myń dollar) boldy.
Jýrnalısterdiń nazaryn aýdarǵan taǵy bir kólik 1972 jyly shyqqan Fiat 500L boldy. Burynǵy premer-mınıstr Devıd Kemeronnyń áıeli Samantaǵa tartý etken bul kóligi 21 myń fýntqa (26 myń dollar) satyldy.
Biraq, satylymǵa shyǵarylǵan birneshe kólik ótpeı qaldy. Máselen, 215 myń fýnt (270 myń dollar) turatyn Elızaveta patshaıymnyń 2012 jylǵy Bentley Mulsanne kóligin satyp alýshy tabylmady. Sondaı-aq, akter Maıkl Ýınnerge tıesili 1976 jylǵy Bentley, hanshaıym Margaret mingen 1980 jylǵy Rolls-Royce satylǵan edi.
