Hanoıda vetnam tiline aýdarylǵan Ál-Farabı kitabynyń tusaýkeseri ótti
HANOI. KAZINFORM — Qazaqstannyń Vetnamdaǵy Elshiligi Hanoı ýnıversıtetinde, Memleket basshysynyń Qazaqstan halqyna Joldaýyna, QR Memlekettik egemendiginiń 35-shi jyldyǵyna jáne Ál-Farabıdiń 1155-shi jyldyǵyna oraı, Hanoıda saltanatty is-shara ótkizdi. Bul týraly SІM málim etti.
Orta ǵasyrlyq fılosof, tanymal ǵalym Ábý Nasyr Ál-Farabıdiń «Minsiz memleketke umtylý kerektigi týraly traktaty» atty kitabynyń vetnam tiline aýdarylǵan nusqasynyń tusaý keseri ári tanystyrylymy ótti.
Іs-shara barysynda Vetnamnyń tuńǵysh prezıdenti Ho Shı Mınniń 1959 jylǵy QazKSR-ge jasaǵan tarıhı sapary týraly derekti fılm, sondaı-aq, bıyl 5-7 mamyr aralyǵynda ótken VKP Bas hatshysy To Lamnyń Qazaqstanǵa memlekettik sapary týraly vıdeo kórsetildi.
Bul mańyzdy is-sharaǵa bolý eliniń SІM Birinshi orynbasary, VKP Ortalyq komıtetiniń múshesi Ngýen Man Kyong, Vetnamnyń Dostyq qaýymdastyqtary Odaǵynyń vıtse-prezıdenti Ngýen Ngok Hýng, memlekettik organdarynyń, JOO-lardyń, isker toptarynyń, BAQ ókilderi jáne Hanoıdaǵy dıplomatııalyq korpýstyń basshylyǵy (Dýaıen, Palestına Elshisi Saadı Salama) jáne dıplomattar qatysty.
Qazaqstan Elshisi Qanat Týmysh is-sharanyń ashylýynda qatysýshylar aldynda Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýy jáne Memlekettik egemendik týraly Deklaratsııanyń 35-jyldyǵynyń táýelsizdik pen jańǵyrýdyń sımvoly retindegi mańyzyna keńinen toqtalyp, sóz sóıledi.
Búgingi tańda Qazaqstan Respýblıkasy egemendiginiń 35-shi jyldyǵyn jańarǵan, jańǵyrǵan el, ádildikti tý etken memleket bıiginde qarsy alýda, qazaq eli álemdik deńgeıde óziniń beıbit baǵytymen jáne qoǵamdyq-saıası turaqtylyǵymen tanymal ekenin maqtanyshpen habarlady.
Sonymen qatar bıyl Qazaqstan men Vetnam arasynda strategııalyq áriptestik ornatylǵany, eki eldiń jan-jaqty yntymaqtastyqty ári qaraı damytýǵa beıildiligi, joǵary deńgeıde qol jetkizilgen ýaǵdalastyqtardy saıası, saýda-ekonomıkalyq jáne ınvestıtsııalyq salalarda júıeli túrde oryndaýdyń mańyzdylyǵy atalyp ótti.
Elshi Q.Týmysh orta ǵasyrlyq fılosof, ǵalym Ábý Nasyr Ál-Farabıdiń 1155-jyldyq mereıtoıyna oraı vetnam tiline aýdarylǵan «Minsiz memleketke umtylý kerektigi týraly traktaty» atty kitabynyń tusaýkeser rásiminde Ál-Farabıdiń álemdik órkenıetke qosqan zor úlesine aıryqsha toqtaldy.
Álemniń ekinshi ustazy Ál-Farabıdiń kitabyn vetnam tiline aýdarǵan Hanoı Ýnıversıtetiniń professory Ngýen Van Chıenge, Qazaqstandy, Túrki jáne Islam álemderin Vetnammen jaqyndatý turǵysynan qosqan mańyzdy úlesi úshin alǵysyn bildirdi.
Buǵan qosa Qazaqstan Elshisi Vetnam men Túrki áleminiń mádenıeti men óneri arasyndaǵy baılanystarǵa qosqan súbeli úlesi úshin professor Ngýen Van Chıenge Túrkııa men Ázirbaıjan Elshilerimen birge, Halyqaralyq Túrki mádenıeti uıymynyń (TÜRKSOY) Bas hatshysy atynan altyn medal tabystady.
Óz kezeginde Vetnam SІM birinshi orynbasary Ngýen Man Kyong Qazaqstannyń búginde aımaqtyq jáne jahandyq mańyzy artyp kele jatqan ult retinde qalyptasyp, ótken men bolashaq, mádenı mura men jańǵyrý arasyndaǵy úılesimdiliktiń úlgisine aınalǵandyǵyn aıtty.
2025 jylǵy mamyr aıynda Vetnam Kommýnıstik partııasynyń Ortalyq komıtetiniń Bas hatshysy To Lamnyń Qazaqstanǵa memlekettik sapary sheńberinde ekijaqty baılanystardy resmı túrde Strategııalyq áriptestikke kótergennen keıin qarym-qatynastarymyz úshin tarıhı kezeń bastalǵandyǵyn atap ótti. Vetnam men Qazaqstan birlesip, jańa serpinmen alǵa jyljýlary qajet. Ngýen Man Kyong, buǵan ári saıası senim, ári tabandylyq, ári ortaq umtylystyń bar ekenin málimdep, qazaqstandyqtardy Respýblıka kúnimen, kele jatqan Táýelsizdik kúnimen jáne Ál-Farabıdiń mereıtoıymen quttyqtady.
Onyń aıtýynsha, Ál-Farabıdiń «Minsiz memleketke umtylý kerektigi týraly traktaty» atty kitap, Hanoıda vetnam tiline aýdarylyp, jaryq kórýi – eki el arasyndaǵy mádenı jáne akademııalyq almasýdyń qundy dáleli bolyp tabylady, onyń zııatkerlik murasyn vetnamdyq ǵalymdarǵa, stýdentterge jáne oqyrmandarǵa jaqyn etýge múmkindik bermek.
Іs-sharanyń sońynda, Elshi barlyq qatysýshylarǵa Ál-Farabıdiń vetnam tilindegi «Minsiz memleketke umtylý kerektigi týraly traktaty» atty kitapty tabys etti. Qazaqstan Elshisi vetnamdyq BAQ ókilderine suhbat berip, is-sharany qorytyndylady.
Eske sala keteıik, buǵan deıin Ózbekstanda Ábý Nasyr ál-Farabı jazǵan kitap tabylǵanyn jazǵan edik.