Hanoı túbinde áskerı tikushaq apatqa ushyrady, 16 adam qaza boldy
ASTANA. QazAqparat - Vetnam astanasynyń mańynda reseılik óndiris shyǵarǵan Mı-171 áskerı tikushaǵy apatqa ushyrady. Tikushaq jattyǵýlarǵa qatysyp jatqan parashıýtshilerdi tasymaldap júrgen bolatyn.
RBK-niń Thanh Nien agenttigine silteme jasap habarlaýynsha, tikushaq túgel janyp ketken. Resmı málimetterge qaraǵanda, 16 adam qaza boldy, 5-ýi jaralandy. Bortynda Vetnam armııasynyń 916-polkynyń barlyǵy 21 áskerı qyzmetshisi bolǵan. Apat saldarynan jerde eshkim de zardap shekpegen.
Mı-171 áskerı-tasymal tikushaǵy Mı-8 tikushaǵynyń eksportqa yńǵaılanǵan modelderiniń biri. Onyń mindeti - desanttardy, barlaý operatsııalaryn, torýyldaýdy tasymaldaý jáne jedel túsirý. Sondaı-aq Mı-171-di qutqarý operatsııalaryn júrgizý úshin satyp alady. Bul tehnıka álemniń kóptegen elderine, sonyń ishinde Qytaıǵa, Brazılııaǵa, Sýdanǵa, Chehııaǵa, Horvatııaǵa jetkizilgen.
Ýlan-Ýdedegi avıatsııa zaýyty shyǵarǵan tórt Mı-171 tikushaǵy 2005 jyly Vetnamǵa satyldy. Sol kezde Vetnam qorǵanys mınıstrligi onyń sapasyna rızashylyǵyn bildirgen jáne jańa jetkizilimder jóninde ýaǵdalasqan bolatyn.
