Hankóldegi «eles qyz»: BQO polıtseıleri tekseris nátıjesin jarııalady
ORAL. QazAqparat –Batys Qazaqstan oblystyq Polıtsııa departamentiniń baspasóz qyzmeti Hankóldegi «sary qyzdyń» elesine qatysty júrgizilgen tekseris nátıjesin málim etti, dep habarlaıdy QazAqparat tilshisi.
Qaratóbe aýdany Hankól aýylynyń turǵyndary áleýmettik jeli arqyly eldi meken mańynda «sary qyzdyń» elesi paıda bolǵany jóninde aqparat taratqan bolatyn.
Osyǵan oraı, oblystyq Polıtsııa departamenti basshysynyń tapsyrmasyna sáıkes Qaratóbe aýdandyq polıtsııa bóliminiń qyzmetkerleri tekseris júrgizdi.
Aýylǵa baratyn barlyq joldar vıdeoǵa túsirildi.
Anyqtalǵandaı, eles qyzǵa baılanysty taralǵan vıdeodaǵydaı jol men aǵashtar atalǵan aýyl aýmaǵynda joq.
Sonymen qatar polıtsııa qyzmetkerleri aýyl turǵyndarymen kezdesip, saýalnama júrgizdi. Vıdeoda kórsetilgen derekti eshqaısysy rastamady. Bári de mundaı elesti kórmegenin, ózderin eshkim mazalamaǵanyn aıtady.
Sondaı-aq atalǵan vıdeonyń Qazaqstanǵa esh qatysy joq ekendigi jóninde aqparat bar. Bul vıdeo 2019 jyly Reseıdiń áleýmettik jelilerinde áldeneshe ret taralyp, onda túrli aımaqtar kórsetilgen.
Qaratóbe aýdany polıtsııa bóliminiń bastyǵy mindetin atqarýshy Maman Isaǵalıevtiń aıtýynsha, vıdeonyń Hankól eldi mekenine esh qatysy joq. Ol osydan 11 aı buryn Youtube kanalyna Andreevıch degen laqap esimmen júktelgeni anyqtaldy.
«Hankólden Samara-Shymkent kúre jolyna deıingi jol tekserildi. Jol jıeginde tyǵyz ornalasqan tal-terektiń joqtyǵy da vıdeonyń jalǵan ekendigin dáleldeıdi. Sondyqtan aýdan jáne aýyl turǵyndarynan jalǵan aqparatqa senbeýdi jáne taratpaýdy ótinemiz», - dedi M.Isaǵalıev.
Eske sala keteıik, budan buryn BQO ákiminiń «sary qyzdyń» elesine baılanysty túsinik bergenin, polıtseılerdiń aqparatty tekseretinin jazǵan bolatynbyz.
