Hande Ercheldiń esirtkige tapsyrǵan test qorytyndysy jarııalandy

ASTANA. KAZINFORM — Tanymal túrik aktrısasyna qatysty tergeý amaldary júrgizildi, biraq test qorytyndylary oǵan qatysty kúdikti rastaǵan joq, dep habarlaıdy Kazinform agenttiginiń Ankaradaǵy menshikti tilshisi. 

Túrik aktrısasy, «Esigimdi qaqshy» (túrikshe: «Sen Çal Kapımı») telehıkaıasynyń juldyzy Hande Erchel Ystanbul qalalyq prokýratýrasy el shoý-bıznesi ókilderi arasynda zańsyz zattardy qoldaný yqtımaldyǵyna qatysty bastaǵan tergeý isinde tekserilgender qataryna kirdi.

Ony shaqyrý týraly sheshim qabyldanǵannan keıin aktrısa shetelden Túrkııaǵa oralyp, kýálik berdi. Keıinnen ol Sot medıtsınasy ınstıtýtynda medıtsınalyq tekserýden ótti, odan bıomaterıal alyndy.

Túrik BAQ habarlaýynsha, aktrısanyń test qorytyndysy onyń aǵzasynda zańsyz zattar joq ekenin kórsetti. 

Erchel óz kýáliginde eshqashan esirtki nemese qozdyrǵysh zattardy qoldanbaǵanyn atap ótti. Ol sondaı-aq 13 jyl boıy qoǵam nazarynda bolǵanyn jáne kórermender aldyndaǵy jaýapkershiligin túsinetinin qosyp ótti.

— Men árqashan salaýatty ómir saltyn ustanyp kelemin, buǵan ishinara mamandyǵym sebep boldy. Men kópshilikke úlgi ekenimdi túsinip, soǵan saı ómir súrýge tyrysyp júrmin. Meniń esimim osyndaı ispen baılanystyrylǵanyna qatty qynjylamyn, — dedi telejuldyz.

Saraptama aktrısanyń ustanymyn rastap, tergeýge qatysty kez kelgen kúdikti joıdy. 

Eske sala ketsek, Túrkııadaǵy esirtki isinde tanymal on adamnyń jeteýinde test qorytyndysy esirtki bar ekenin kórsetti. 

Sondaı-aq bul elde esirtki men zańsyz bás tigýlerge qarsy operatsııalar ótkizilgeni habarlandy.