Hanchjoýda XIX Azııa oıyndaryn ótkizý merzimi keıinge shegerildi

BEIJІŃ. QazAqparat – Qytaıdyń shyǵysyndaǵy Chjetszıan provıntsııasy Hanchjoý qalasynda XIX Azııa oıyndary 2022 jyldyń qyrkúıegine josparlanǵan edi, onyń merzimi keıinge shegerildi, dep habarlaıdy QazAqparat menshikti tilshisi.

Qytaıdyń memlekettik BAQ-tarynyń aqparatynsha, bastapqyda Qytaıdyń Hanchjoý qalasynda 2022 jylǵy 10-25 qyrkúıek aralyǵyna josparlanǵan XIX Azııa oıyndary keıinge shegerildi. Oıyndy ótkizýdiń jańa kúni taıaý ýaqytta jarııalanady.

QR Ulttyq Olımpıada komıtetiniń málimetine qaraǵanda, Hanchjoýda ótetin XIX Azııa oıyndarynda 61 dıstsıplınadan turatyn 40 sport túri usynylady. Oıyndarda 482 altyn medal sarapqa salynady.

Beısenbi kúni Gonkongtyń South China Morning Post gazeti Qytaıdyń Chendý qalasynda 26 maýsym men 7 shilde aralyǵynda josparlanǵan Dúnıejúzilik jazǵy Ýnıversıadanyń merzimi ekinshi ret keıinge qaldyrylýy múmkin ekenin habarlaǵan.

Ýnıversıada 2021 jyldyń tamyzynda ótýi tıis edi, alaıda koronavırýs pandemııasyna baılanysty 2022 jylǵa aýystyryldy.