Hanchjoýda ótetin IV jazǵy Azııa Para oıyndaryna qatysatyn sportshylar dúbirli dodaǵa daıyn ba
Hanchjoý-2022 IV jazǵy Azııa Para oıyndaryna qatysatyn ulttyq qurama sportshylary jarysqa qalaı daıyndyǵy týraly aıtty, dep habarlaıdy Kazinform.
Paradzıýdodan álem chempıony, QR eńbek sińirgen sport sheberi Erǵalı Shameıdiń aıtýynsha, qazir qyzý daıyndyq júrip jatyr.
«Quramamyz Azııa Para oıyndaryna tolyq daıyn desem bolady. Qazir eki aptalyq daıyndyq ótip jatyr. Kúndelikti tatamı ústinde jattyǵyp júrmiz. Jalpy, 2018 jyly Qazaqstan quramasy eń alǵash Azııa Para oıyndaryna qatysqan bolatyn. Ol kezde komandamyz úshinshi oryn alǵan. Bıyl ekinshi márte qatysqaly tur. Bul joly burynǵydan joǵary deńgeıde óner kórsetemiz degen oıdamyn. Qazir daıyndyq óte jaqsy. Aıtý kerek, bıyl dzıýdodan Para álem oıyndarynda bizdiń komanda jalpykomandalyq esepte birinshi oryn alǵan bolatyn. Jalpy, Para Azııa oıyndaryna qatysqaly otyrǵan qyz- jigitterden kóp úmit kútemiz. Olardyń barlyǵy sportpen burynnan aınalysyp kele jatqan myqty sportshylar», - dedi Erǵalı Shameı.
2016 jyly Rıo-de-Janeıroda ótken Paralımpıadanyń kúmis júldegeri, QR eńbek sińirgen sport sheberi Raýshan Qoıshybaevanyń aıtýynsha, sportshylar qazir jarysqa 100% daıyn.
«Qazir jarysqa saqadaı saı daıynbyz. Jarysta eń bastysy eldegi daıyndyǵymyzdyń jaqsy nátıjesin kórsete bilý. Soǵan umtylý kerek. Jalpy, biz parasportshylar bir-birimizdi únemi qoldap otyramyz. Bıyl sondaı-aq Azııa oıyndaryna buryn qatyspaǵan jańa sportshylar barmaqshy. Olarǵa da zor úmit artylyp otyr. Qazir daıyndyq jaqsy ótip jatyr. Men buryn 67 keli salmaqta saıysqa túsetinmin. Búgingi kúni 73 kelige aýystym. Bul salmaqta meniń qarsylastarym osal emes. Alaıda oǵan qaramaı, jarysta bar kúshimizdi salyp, elimizdiń Týyn bıikke kóterip, kóp medal alý úshin aıanbaıtyn bolamyz», - dedi Raýshan Qoıshybaeva.
Para dzıýdodan halyqaralyq dárejedegi sport sheberi Alfııa Tilekqabyl dzıýdomen aınalysyp kele jatqanyna bir jyldaı ǵana ýaqyt bolǵan. Alaıda osy ýaqyt ishinde ol ekinshi Azııa oıyndaryna barmaqshy.
«Jasym 17-de. Para dzıýdomen aınalysyp júrgenime bir jyldaı ýaqyt boldy. Buǵan deıin Azııa chempıony atanǵanmyn. Bul jetistikke men kóp jattyǵý jasaý arqyly keldim. Qazir Para Azııa oıyndaryna daıyndyq jaqsy ótip jatyr. Ol úshin barlyq jaǵdaı jasalǵan. Aldaǵy jarysta men 57 keli salmaqta qatysamyn. Aldaǵy maqsatym – osy Para Azııa oıyndarynda birinshi oryn alyp, kelesi jyly Parıjde ótetin paralımpıadaǵa joldama alyp, oǵan qatysý», - deıdi Alfııa.
Eske salaıyq, sary qurlyqtyń basty básekesi 22-28 qazan aralyǵynda Hanchjoý qalasynda ótedi.
Sondaı-aq Almatyda Hanchjoý-2022 IV jazǵy Azııa Para oıyndarynda óner kórsetetin ulttyq qurama sportshylaryn saltanatty shyǵaryp salý jıyny ótkenin habarlaǵanbyz.
