Hanchjoý - Almaty áýe reısimen alǵashqy jolaýshylar ushyp keldi

ALMATY. QazAqparat – Qytaıdyń áýe kompanııasy Qazaqstan baǵytynda reıs ashty, dep habarlaıdy QazAqparat Kólik mınıstrliginiń Azamattyq avıatsııa komıtetine silteme jasap.

Qazaqstan Respýblıkasy men Qytaı Halyq Respýblıkasy avıatsııalyq bılikteriniń birlesken jumysynyń arqasynda búgin qytaılyq «Loong Airlines» áýe kompanııasy Hanchjoý - Almaty baǵyty boıynsha alǵashqy jolaýshylar reısin oryndady. A321 úlgisindegi áýe kemeleri aptasyna 3 ret (seısenbi, beısenbi jáne senbi kúnderi) ushady.

«Jańa áýe tasymaldaýshynyń Qazaqstan áýe tasymaly naryǵyna kirýi, sondaı-aq jańa áýe baǵytynyń ashylýy elder arasyndaǵy saýda-ekonomıkalyq, týrıstik jáne mádenı yntymaqtastyqty odan ári damytýǵa yqpal etedi», - delingen komıtet málimdemesinde.

Aıta ketsek, Hanchjoý qalasy – Chjetszıan provıntsııasynyń astanasy. Qala halqynyń sany – 10 mln. 23 qyrkúıek pen 8 qazan aralyǵynda qalada 19-shy Azııa oıyndaryn ótkizý josparlanyp otyr. Hanchjoý qalasynyń áýejaıy – Qytaıdaǵy eń kóp jumys isteıtin 10 áýejaıdyń biri.