Hanbıbi Esenqaraqyzynyń alty tomdyq shyǵarmalar jınaǵy jaryq kórdi
ALMATY. Jeltoqsannyń 12-si. QazAqparat /Erlik Erjanuly/ - Búgin Almatyda Qazaqstan Respýblıkasyna eńbegi sińgen qyzmetker,
"Parasat" ordeniniń ıegeri, Jazýshylar odaǵynyń múshesi, aqyn Hanbıbi Esenqaraqyzynyń alty tomdyq shyǵarmalar jınaǵynyń tusaýkeseri rásimi ótti, dep habarlaıdy QazAqparat.
Jınaqtyń 1-2 tomy Almatydaǵy "Jazýshy" baspasynan, 3-6 tomdary Shymkent qalasyndaǵy "Ordabasy" baspasynan jaryq kórip otyr. Alǵashqy eki tomǵa - poezııalyq, al ózge tórt tomǵa prozalyq týyndylary toptastyrylǵan.
"H. Esenqaraqyzynyń 60 jyldyq mereıtoıyn Almatyda atap ótýi úlken oqıǵa. Oblystardaǵy mádenıet pen óner qaıratkerleriniń Astana, Almaty qalalarynda mereıtoıyn atap ótýi sońǵy 10-15 jyldan beri úzilip qalǵan bolatyn. Bul dástúr bizdiń zııaly qaýym úshin odan ary óz jalǵasýy tıis. Úlken Qazaqstannyń túkpir-túkpirindegi talanttardy jınaqtaý, kórsetý budan ary da jalǵasýy qajet. Hanbıbi kórmeı qalýǵa, baıqamaı qalýǵa bolmaıtyn tulǵa. Alǵashqy jyr jınaǵynan bastap kıeli óleń sózge adaldyq tanytty. Qaı kezde, qandaı óleń jazsa da aǵynan jarylyp otyrdy. Aq qaǵazǵa degen adaldyǵynan taımady. Onyń shyǵarmashylyǵyna degen qurmet osydan kelip týady ǵoı deımin", deıdi jazýshy Smaǵul Elýbaı. Al Qazaqstan Jazýshylar odaǵy tóraǵasynyń orynbasary Ǵalym Jaılybaıdyń aıtýynsha, Saryaǵash aýdanynyń qurmetti azamaty, qaıratker Hanbıbi Esenqaraqyzy uzaq jyldar boıy Ońtústik Qazaqstan oblystyq mádenıet basqarmasyn basqardy, Qazaq tili qoǵamynyń tóraıymy boldy, endi 7 jyldan beri oblystaǵy qýǵyn-súrgin qurbandarynyń murajaıyna basshylyq jasap kele jatyr. Búgin endi 6 tomdyq shyǵarmalar jınaǵynyń tusaýyn kesken soń, Ádebıetshiler úıinde jyr keshin ótkizgeli otyr.
