Han-ıÝnýs mýnıtsıpalıteti: Izraıl qalanyń 85%-yn joıyp jibergen
ASTANA. KAZINFORM — Izraıl tarapynan eki jyldan astam ýaqyt boıy jalǵasqan genotsıd saldarynan Gaza sektorynyń ońtústiginde ornalasqan Han-ıÝnýs qalasynyń 85%-dan astamy qıraǵan, dep habarlaıdy Anadoly.
Han-ıÝnýs qalasynyń meri Alaaddın ál-Batta qala ákimdiginiń qıraǵan ǵımaratynyń janynda baspasóz máslıhatyn ótkizdi.
— Gaza sektorynyń eń iri qalalarynyń biri bolyp sanalatyn, aýmaǵy 110 sharshy shaqyrymdy quraıtyn Han-ıÝnýs qalasynyń 85%-dan astamyn Izraıl joıyp jiberdi, — dep málimdedi Batta.
Ol qıraýlar turǵyn úılerge, ǵımarattarǵa, memlekettik jáne jekemenshik mekemelerge, joldarǵa, ınfraqurylymǵa, sondaı-aq qyzmet kórsetý jáne oıyn-saýyq nysandaryna da áser etkenin aıtyp, saldarynan júzdegen tonna qoqys paıda bolǵanyn jetkizdi.
— Qonys aýdarǵan turǵyndardyń óz úılerine nemese úıleriniń ornyna qaıta oralýy úshin tek Han-ıÝnýs kóshelerinen 400 myń tonna qoqysty shuǵyl túrde shyǵarý qajet, — dedi mer.
Sondaı-aq, Izraıl eki jyldan astam ýaqytqa sozylǵan shabýyldar barysynda qalanyń 85% jolyn, ıaǵnı 210 shaqyrym jol jelisin joıǵanyn aıtty.
— Izraıl 400 shaqyrymdyq sý qubyry jelisiniń 300 shaqyrymyn, al 200 shaqyrymdyq káriz júıesiniń 150 shaqyrymyn tolyqtaı joıyp jiberdi, — dedi Batta.
Palestınalyq sheneýnik Izraıl Han-ıÝnýstaǵy 136 saıabaqty, demalys aımaqtaryn, jasyl jelekter men mýnıtsıpaldyq nysandardy da qıratqanyn habarlady.
Batta qoqys máselesine de toqtaldy.
— Alǵashqy baǵalaýlar boıynsha, Han-ıÝnýs kóshelerinde 350 myń tonnadan astam qoqys jınalyp qalǵan, — dedi ol.
Merdiń aıtýynsha, mýnıtsıpalıtet qatty qaldyqtardy jınaý salasynda úlken daǵdarysqa tap bolǵan. Buryn negizgi qaldyq jınaý ortalyǵy Gaza sektorynyń shyǵysynda, Fahýra shekaralyq eldi mekeniniń janyndaǵy Sýfa aýdanynda ornalasqan bolatyn. Alaıda Izraıl armııasy bul aımaqtan ketken joq.
Batta bul daǵdarysty sheshý úshin resmı sharalar qabyldaý qajettigin, genotsıdtiń zardaptaryn eńserý jáne qalpyna keltirý kezeńine ótý úshin kúsh biriktirý kerek ekenin atap ótti. Sonymen qatar, aımaqtaǵy úıindilerdi tazartý úshin janarmaı, zamanaýı tehnıkalar men generatorlarmen qamtamasyz etýdi surady.
Mysyrda qol jetkizilgen kelisimnen keıin Gaza sektorynda 10 qazan kúni jergilikti ýaqytpen 12:00–de atysty toqtatý kúshine endi.
Izraıl armııasynyń jazbasha málimdemesinde áskerdiń «sary syzyq» dep belgilengen núktelerge ishinara sheginýi aıaqtalǵany aıtyldy.
Osydan buryn Izraıl men HAMAS arasyndaǵy atysty toqtatý kelisimi kúshine engennen beri 250 myńǵa jýyq adam Gaza qalasyna oraldy.