Han Táńiri shyńynda Chernogorııadan kelgen alpınıst qaza tapty
NUR-SULTAN. QazAqparat-Kabar – Han Táńiri shyńynda (7 010 metr) 7 tamyzda qaıǵyly oqıǵa boldy – Chernogorııadan kelgen alpınıst Mılan Radovıch qaza tapty. Onyń múrdesi bazalyq lagerge jetkizildi, dep habarlaıdy QazAqparat Kabar agenttigine silteme jasap.
«Fızıkalyq jáne tehnıkalyq daıyndyqty qajet etetin, 7010 metr bıiktiktegi Han Táńiri shyńyna sátti shyqqan Mılan Radovıch 4-shi bıiktik lagerine túsken bolatyn. Keıin ol turǵan muz shytynap ketip, 1 000 metr quzdan qulap, chernogorııalyq alpınıst qaza tapty», - delingen «Visokogorci Crne Gore» alpınıster klýbynyń saıtynda.
Aıta ketken jón, marqummen birge jumys istegen áriptesi Aleksandr Djadjıch zardap shekpegen. Ol qaıǵyly oqıǵa bolǵan kezde palatkanyń ishinde bolǵan. Alpınıster palatkany 6 400 metr bıiktikte ornatqan.
«Ak-Saı trevel» týrıstik kompanııasynyń keńesshi-qutqarýshysy Tımýr Malahýnovtyń aıtýynsha, qaza tapqan chernogorııalyq alpınıstiń denesi bazalyq lagerge jetkizildi.
Eske salaıyq, chernogorııalyq alpınıster Tıan-Shan taýynda ekspedıtsııany 20 shildede bastaǵan. Olardyń basty maqsaty – 7 439 metr bıiktiktegi Jeńis shyńyna shyǵý bolǵan.
