«Han Shatyrǵa» sheteldikter emes, qazaqstandyq kásipkerler ıelik etýi tıis - sarapshy Starr

ASTANA. QazAqparat - Búgin «Qazaqstan Respýblıkasynyń Táýelsizdigine 25 jyl: nátıjeler, jetistikter, keleshek kókjıegi» taqyrybyndaǵy xalyqaralyq konferentsııada Dj. Hopkıns ýnıversıtetiniń Ortalyq Azııa ján Kavkaz boıynsha ınstıtýttyń tóraǵasy Frederık Starr Qazaqstan ekonomıkasyn damytýǵa qatysty birqatar keńester berdi, dep xabarlaıdy QazAqparat tilshisi.

«Birinshiden, tabysty memleketterdiń qataryna qosylý úshin Qazaqstannyń ekonomıkasyn barynsha ártaraptandyrý qajet. Sóz joq, osy jolda biraz is-sharalar qolǵa alyndy. Sonyń bári óz nátıjesin beredi. Degenmen, aýyl sharýashylyǵyn damytý jumysyna erekshe den qoıý qajet. Qazaqstanda «Astana» xalyqaralyq qarjy ortalyǵyn qurý da  batyl bastamalardyń biri. Alaıda shaǵyn jáne orta bıznesti de umytpaý qajet. Olarǵa nesıelerdi kóptep berý kerek. Bolashaqta, shamamen 10 jyldan keıin shaǵyn jáne orta kásipkerlerdiń sany barynsha kóp bolǵan jón. Máselen, sol kezde «Han Shatyr» saýda ortalyǵyndaǵy býtıkterge sheteldikter emes, qazaqstandyq bıznesmender ıelik etýi tıis», - deıdi F.Star.

Sondaı-aq sheteldik sarapshy Qazaqstannyń bilim berý salasyndaǵy reformalarǵa oń baǵa berip, kásibı-texnıkalyq daıyndyqty da nazardan tys qaldyrmaýǵa keńes berdi.

«Bálkim, Qazaqstanǵa mýltıvektorly aqparattyq saıasatty júrgizýdi qolǵa alý qajet. Ondaıda qazaqstandyqtar aqparattyq tabloǵa qarap, álem elderiniń ne istep, ne bitirip jatqanyn ózderi kórip, deldalsyz bile alady. Sol kezde óz bilimińdi, jalpy daıyndyǵyńdy álem elderiniń azamattarymen salystyrýǵa múmkindik bar», - dep atap kórsetti sarapshy.

Aıta keteıik, búgingi konferentsııaǵa Túrkııa, Reseı, Fınlıandııa, sondaı-aq Eýropalyq odaqtyń ókilderi qatysýda. Sharany ashqan QR Parlament Májilisiniń spıkeri Nurlan Nyǵmatýlın 90-jyldardyń qıyn qystaý kezeńin, sol kezdegi gıperınflıatsııanyń xalyqtyń ál-aýqatyna qalaısha áser etkenin eske aldy.   Al Túrkııanyń Uly ulttyq jınalysy tóraǵasynyń orynbasary Mexmet Akıf Hamzachebı Qazaqstannyń terrorızm men ekstremızmmen kúres salasyndaǵy saıasatyna toqtalyp, Fetxýllah Gúlenniń  uıymyn birlesip joıýǵa qatysty óz oıyn bildirdi.