Han shatyrǵa kelgen boıjetken qundyz ishigin urlatyp aldy
ASTANA. QazAqparat - Elordalyq boıjetken quny jarty mıllıon teńge bolatyn qundyz ishigin urlatyp aldy, dep habarlaıdy QazAqparat.
«Polıtsııaǵa qala turǵyndarynyń biri 5 qańtar kúni shamamen saǵat 22-00-de «Han Shatyr» saýda oıyn-saýyq ortalyǵynyń «KFC» dámhanasynan belgisiz bireýdiń quny shamamen 500 myń teńge bolatyn qara tústi qundyz ishigin oryndyq ústinen urlap ketkendigine aryzdandy. Boıjetken ishigin bos turǵan oryndyqtardyń birine qoıyp, tapsyrys berýge ketip qalǵan. Birneshe mınýttan kelgennen keıin ishiginiń joq ekendigin kórgen», - dedi Astana qalalyq ishki ister departamentinen.
Qazirgi ýaqytta kúdikti anyqtaý jáne ustaýǵa baǵyttalǵan keshendi jedel izdeý sharalary júrgizilýde. Polıtsııa qyzmetkerleri atalǵan is boıynsha QR Qylmystyq kodeksiniń 188-babymen sotqa deıingi tergeý amaldaryn júrgizýde.
«Atalǵan qylmysty jasady degen kúdikke 25-30 jastaǵy, boıy 165-170 sm, kapıýshony bar qara tústi kýrtka, kók djısy shalbaryn kıgen adam iligip otyr. Astana qalalyq ishki ister departamenti kúdiktini anyqtaýǵa járdemdesýdi ótinedi. Oqıǵa kýgerleri men qandaı da bir aqparatty biletin azamattardy myna telefon nómirlerine habarlasýyn suraımyz: 8 (7172) 71-65-50, 71-65-58 nemese 102», - dedi vedomstvodan.
Sonymen qatar Astana qalalyq ishki ister departamenti qala qonaqtary men turǵyndaryna qoǵamdyq oryndarda jáne adam kóp jınalǵan jerlerde bolǵan kezde jeke zattaryna barynsha saq bolýdy eskertedi.
